အရင်အစိုးရပိုင်ရုပ်သံက လွှင့်ထုတ်နေတဲ့လိုင်းနေရာတွေမှာ ပုဂ္ဂလိကရုပ်သံလိုင်းတွေနဲ့ ပြောင်းလဲလွှင့်ထုတ်ဖို့ အဆိုပြုထားတဲ့ လျှောက်လွှာ ၄၀ ကျော်ထဲကနေ ပုဂ္ဂလိကလုပ်ငန်း ၅ ခုကို အစိုးရက ရွေးချယ်လိုက်ပါပြီ။ ပဏာမရွေးချယ်ထားတဲ့ လုပ်ငန်း ၁၀ ခုကနေ နောက်ဆုံးအဆင့် ၅ ခုကိုရွေးချယ်လိုက်တာပါ။လုပ်ကိုင်ခွင့်ရတဲ့ပုဂ္ဂလိကရုပ်သံလိုင်းတွေအနေနဲ့ ဘယ်လောက်အထိလွတ်လွတ်လပ်လပ် လုပ်ကိုင်ခွင့်ရနိုင်မလဲ ကိုရန်နိုင်က ဆက်သွယ်မေးမြန်းထားပါတယ်။
မြန်မာ့အသံ နဲ့ ရုပ်မြင်သံကြား (MRTV) ရဲ့ Free To Air Digital Channel ရုပ်သံလိုင်း ၅ လိုင်း အတွက် ထုတ်လွှင့်ခွင့်ရသွားတဲ့ ကုမ္ပဏီအဖွဲ့အစည်း ၅ ခုကို ပြန်ကြားရေးဝန်ကြီးဌာနက ဒီကနေ့ ရွေးချယ်လိုက်ပါတယ်။ ရုပ်သံလွှင့်လုပ်ငန်းလုပ်ကိုင်ခွင့်ရသွားတဲ့ ကုမ္ပဏီ ၅ ခုကတော့ မဇ္ဈိမမီဒီယာကုမ္ပဏီ၊ Young Investment Group, ကောင်းမြန်မာအောင်၊ Fortune International နဲ့ DVB Multimedia Group တို့ပဲဖြစ်ပါတယ်။ အခု ကုမ္ပဏီတွေအနေနဲ့ ဘယ်လောက်အထိ သတင်းမီဒီယာလွတ်လပ်ခွင့် အပြည့်ရှိရှိလုပ်နိုင်မလဲဆိုတဲ့အပေါ်မှာ The Myanmar Quarterly မဟာဗျူဟာနှင့် မူဝါဒရေးရာဂျာနယ်ရဲ့ အယ်ဒီတာ ကိုနေထွန်းနိုင်က ဗွီအိုအေကို အခုလို ပြောပါတယ်။
“ဘယ်လောက်အထိ လွတ်လပ်နိုင်မလဲဆိုတာကတော့ ၂ ပိုင်းရှိတာပေါ့နော် တခုကတော့ ဒီရုပ်သံလှိုင်းကို ပိုင်ဆိုင်သူတွေရဲ့ အာဘော်ပေါ့နော်၊ သူတို့ရဲ့ရည်ရွယ်ချက်က ဘယ်လောက်အထိ လွတ်လပ်ခွင့်ပေးမလဲ ၊ အယ်ဒီတာအဖွဲ့ကရော ဘယ်လောက်အထိလုပ်နိုင်မလဲဆိုတာပဲ ရုပ်သံလှိုင်းကတော့ လက်ရှိ ပုဂ္ဂလိက သမားတွေအတွက် ဥပမာ DVB အတွက် ဒီ ၄ လိုင်းထဲမှာ ကြည့်မယ်ဆိုရင် DVBကိုပဲ စံပြလို့ပြောရမှာပေါ့နော်။ သူ့အတွက်ကတော့ မခက်ခဲနိုင်ပေမယ့်လို့ ကျန်တာတွေက ဘယ်လိုဆက်လုပ်ကြမလဲဆိုတာကိုတော့ ကျနော် မသိသေးဘူးခင်ဗျ။”
ဒီကုမ္ပဏီတွေအနေနဲ့ ရုပ်သံထုတ်လွှင့်ခအဖြစ်နဲ့ တလကို သိန်း ၂၀၀ ကျပ် ပြန်ကြားရေးကို ပေးသွင်းရဖြစ်ပါတယ်။ ဒါ့အပြင် တခြားကုန်ကျစရိတ်တွေလည်းရှိတာကြောင့် ဒီကုမ္ပဏီတွေအနေနဲ့ ရင်းနှီးမြှုပ်နှံမှုအတွက် ငွေကြေးအမြောက်အမြာလိုအပ်ပြီး ၊ စီးပွားရေးလုပ်ငန်းရှင်သူဌေးကြီးတွေရဲ့ငွေကြေးပံ့ပိုးမှုတွေနဲ့ မှီခိုနေရတယ်လို့ ကိုနေထွန်းနိုင်က ပြောပါတယ်။ ဒီအခြေအနေမျိုးမှာ မီဒီယာတွေအနေနဲ့ ပိုင်ရှင်တွေရဲ့ သြဇာလွှမ်းမိုးမှုကနေရော ဘယ်လောက်အထိ လွတ်လွတ်လပ်လပ်ဖော်ပြနိုင်မလဲ။
“ ပုဂ္ဂလိက ထဲမှာဆိုရင် တတ်နိုင်တဲ့လူက နည်းမယ်ခင်ဗျ မလွဲမသွေဒီပိုက်ဆံရှိပြီးသားဖြစ်တဲ့ သူဌေးကြီးတော့ ကုမ္ပဏီတွေကိုပဲ မှီခိုရမှာဖြစ်တဲ့အတွက်ကြောင့်မို့လို့ သူတို့ကလည်းအစဉ်အဆက်ကြည့်မယ်ဆိုရင် ရှေ့မှာရှိထားပြီးသားဖြစ်တဲ့ Sky Net ကိုပဲ ကြည့်ကြည့် MRTV ကိုပဲကြည့်ကြည့်ကျနော်တို့က sharp ဖြစ်တဲ့သတင်းတွေက အခုအချိန်မှာ ထိုးထွက်လာတာမရှိသေးတဲ့အတွက် အားလုံးသတိထားပြီးလုပ်ကြမှာပဲ ဆိုတော့ အရင်းအနှီးကြီးတဲ့လုပ်ငန်းဖြစ်တဲ့အတွက်ကြောင့် ပိုပြီးတော့ သတိထားရမယ်ပေါ့နော်။ ဒီအပေါ်မှာ ပိုင်ရှင်ရဲ့သြဇာလွှမ်းမိုးမှုက မြန်မာပြည်မှာ ထုံးစံအတိုင်းပဲ သူ့ကို လွန်ဆန်လို့မရတဲ့အနေအထားမျိုးကတော့ ရှိလာလိမ့်မယ်လို့ ကျနော်ထင်တယ် ။ ကျနော်မြင်တာကတော့ Editorial ပိုင်းလွတ်လပ်ခွင့်ဆိုတာကတော့ တမူထူးပြီးတော့မှ ချွန်ထွက်လာမယ့် ပုံစံမျိုးကတော့ မရှိဘူးလို့ ကျနော်မြင်ပါတယ်။”
ဒါ့အပြင် မီဒီယာတွေအနေနဲ့ လက်ဝါးကြီးအုပ်မှုတွေ ပြေပျောက်ပြီး တန်းတူယှဉ်ပြိုင်နိုင်ဖို့အတွက်ဆိုရင်တော့ မီဒီယာဥပဒေကို အမြန်ဆုံးပြင်ဆင်ဖို့လိုတယ်လို့ သူကပြောပါတယ်။ အခုထုတ်လွှင့်ခွင့်ရသွားတဲ့ ရုပ်သံလိုင်း ၅ လိုင်းထဲက မဇ္ဈိမရုပ်သံလိုင်းမှာ ထုတ်လွှင့်မယ်အစီအစဉ်တွေ နဲ့ ပတ်သက်ပြီး မဇ္ဈိမသတင်းမီဒီယာဌာနရဲ့ တာဝန်ရှိသူ ဦးစိုးမြင့်က ဗွီအိုအေကို အခုလိုပြောပါတယ်။
“ကျနေ်ာတို့ဒီ မဇ္ဈိမ ရုပ်မြင်သံကြားလိုင်းမှာတော့ ဘာတွေပါလာမလဲဆိုရင်တော့ နံပတ်၁ကတော့ သတင်းပေါ့နော် ပြည်တွင်းသတင်း နိုင်ငံတကာသတင်း ၊ တိုင်းရင်းသားဒေသတွေရဲ့သတင်း တွေပါမယ်။ ပြီးတော့ ကျနော်တို့ infotainment လို့ခေါ်တဲ့ သတင်းအချက်အလက်နဲ့ ဖျော်ဖြေရေးကို ပေါင်းစပ်ပြီးတော့ ထုတ်လုပ်တဲ့အစီအစဉ်တွေပေါ့ အဲဒါတွေပါပါမယ်။ နောက်ပြီးတော့ ဘာပါမလဲဆိုရင်တော့ ကျနေ်ာတို့ ဖျော်ဖြေရေးသတ်သတ် အစီအစဉ်တွေပါလာပါမယ်ခင်ဗျ ။ အဲဒီတော့ ဒီဟာတွေကို ခြုံပြီးပြောမယ်ဆိုရင်တော့ ဒီဟာက Mix channel ပေါ့နော် သတင်းရယ် ပြီးတော့ ခုနကပြောတဲ့ သတင်းနဲ့ဖျော်ဖြေရေးကိုပေါင်းစပ်တဲ့ အစီအစဉ် ၊ ပြီးတော့ ဖျော်ဖြေရေးသတ်သတ်အစီအစဉ်တွေအဲဒါတွေအစုံပါပါမယ်ခင်ဗျ။”
ဒီရုပ်သံလိုင်းတွေအနေနဲ့ MRTV ရဲ့ လက်ရှိရှိနေပြီးသားစနစ်ထဲကနေ ထုတ်လွှင့်ပြသသွားမှာဖြစ်ပါတယ်။ MRTV က နဂိုရှိပြီးသားရုပ်သံလိုင်း ၁၄ လိုင်းထဲက လိုင်း ၃ လိုင်းကို အစားထိုးပြီး အသစ် ၂ လိုင်း နဲ့ စုစုပေါင်း ၁၆ လိုင်း ပြသသွားမှာဖြစ်ပါတယ်။
