လွှတ်တော် အမတ် လွပ်လပ်နေတဲ့ မဲဆန္ဒနယ် ၁၉ ခု အတွင်း ကျင်းပတဲ့ ကြားဖြတ်ရွေးကောက်ပွဲတွေမှာတော့ လက်ရှိ အာဏာရ အမျိုးသား ဒီမိုကရေစီ အဖွဲ့ချုပ် NLD ပါတီက အများစု အနိုင်ရပြီး၊ ဒီနောက်မှာတော့ ရှမ်းတိုင်းရင်းသားများ ဒီမိုကရေစီ အဖွဲ့ချုပ် SNLD က ဒုတိယ အများစု အနိုင်ရပါတယ်။ အမျိုးသား ဒီမိုကရေစီ အဖွဲ့ချုပ်က လွှတ်တော်နေရာ စုစုပေါင်း ၉ နေရာအနိုင်ရပြီး ဝင်ရောက်ယှဉ်ပြိုင်တဲ့ လွှတ်တော် အမတ်နေရာ ၁၈ နေရာထဲ ၉ နေရာ ရှုံးနိမ့်တာမှာ အားလုံးက လူနည်းစု တိုင်းရင်းသား ဒေသတွေမှာ ဖြစ်ပါတယ်။
ရှမ်းတိုင်းရင်းသားများ ဒီမိုကရေစီ အဖွဲ့ချုပ် ပါတီက လွှတ်တော်အမတ်နေရာ ၆ နေရာ အနိုင်ရပါတယ်။ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေး ပါတီက ၂ နေရာနဲ့ လူမျိုးပေါင်းစုံ ဒီမိုကရေစီ ပါတီ(ကယားပြည်နယ်)နဲ့ ရခိုင်အမျိုးသား ပါတီက တနေရာစီ အနိုင်ရပါတယ်။ ပြည်သူ့လွှတ်တော် လစ်လပ်နေရာ ၉ နေရာမှာတော့ အမျိုးသား ဒီမိုကရေစီ အဖွဲ့ချုပ် NLD ပါတီက ၅ နေရာ နိုင်ပြီး ရှမ်းတိုင်းရင်းသားများ ဒီမိုကရေစီ အဖွဲ့ချုပ် SNLD က ၂ နေရာ အနိုင်ရပါတယ်။
အရင် အာဏာရ ပါတီဟောင်း ပြည်ထောင်စု ကြံ့ခိုင်ရေးနဲ့ဖွံ့ဖြိုးရေး ပါတီနဲ့ ရခိုင်အမျိုးသားပါတီ တို့က ၁ နေရာစီအနိုင်ရပါတယ်။ အမျိုးသား လွှတ်တော် သုံးနေရာ စလုံးကိုတော့ လက်ရှိ အာဏာရ အမျိုးသား ဒီမိုကရေစီ အဖွဲ့ချုပ်က အနိုင်ရပါတယ်။ပြည်နယ်၊ တိုင်းဒေသကြီး လွှတ်တော်နေရာ ၇ နေရာမှာတော့ ရှမ်းတိုင်းရင်းသားများ ဒီမိုကရေစီ အဖွဲ့ချုပ် SNLD က မိုင်းရှုး၊ ကျေးသီးတို့မှာ ပြည်နယ် လွှတ်တော် နေရာ ၄ ခု၊ လက်ရှိ အာဏာရ အမျိုးသား ဒီမိုကရေစီ အဖွဲ့ချုပ် NLD က ရှမ်းပြည်နယ် ညောင်ရွှေမြို့နယ် မဲဆန္ဒနယ် တနေရာ အနိုင်ရပြီး ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေး ပါတီက ရှမ်းပြည်နယ် ကျိုင်းတုံ မဲဆန္ဒနယ် တနေရာ၊ ကယားပြည်နယ် ဖရူးဆိုး မဲဆန္ဒနယ်မှာတော့ လူမျိုးပေါင်းစုံ ဒီမိုကရေစီပါတီ ကယားပြည်နယ် က အနိုင်ရပါတယ်။
ပြည်သူ့ လွှတ်တော် ၉ နေရာ၊ အမျိုးသား လွှတ်တော် ၃ နေရာနဲ့ တိုင်းဒေသကြီး ပြည်နယ် လွှတ်တော် ၇ နေရာတို့ကို မနေ့ ဧပြီလ ၁ ရက်နေ့က နိုင်ငံရေး ပါတီ ၂၄ ပါတီနဲ့ တသီးပုဂ္ဂလ ကိုယ်စားလှယ်ပေါင်း ၉၅ ဦးတို့ ဝင်ရောက်ယှဉ်ပြိုင်ခဲ့ကြတာ ဖြစ်ပါတယ်။
