ဗြိတိသျှလူငယ်၂ဦးဖြစ်တဲ့ David Miller နှင့် Hannah Witheridge တို့ သတ်ဖြတ်ခံခဲ့ရတဲ့ လိပ်ကျွန်းလူသတ်မူနဲ့ ပတ်သက်လို့ သေဒဏ်ပေးခြင်း ခံထားရတဲ့ မြန်မာရွှေ့ပြောင်းလူငယ်၂ဦး ရဲ့ အမှုအတွက် ဗဟိုတရားရုံးကို အယူခံရက်ထပ်တိုးပြီး တောင်းခဲ့ရာမှာ မေလ၂၃ရက်နေ့ ထိ အယူခံတင်မယ့်ရက် ကိုတလတိုးပြီး ခွင့်ပြုခဲ့ပါတယ်။ထိုင်းအခြေစိုက် VOA သတင်းထောက် မအေးအေးမာက သတင်းပေးပို့ ထားပါတယ်။
ထိုင်းနိုင်ငံ ဗြိတိသျှလူငယ် ၂ဦး သတ်ဖြတ်ခံခဲ့ရမူနဲ့ ပတ်သက်လို့ သေဒဏ်ပေးခြင်း ခံထားရတဲ့ မြန်မာရွှေ့ပြောင်းလူငယ်၂ဦး ကို ထိုင်းတရားရုံးက ဒီဇင်ဘာလ ၂၄ ရက်နေ့က သေဒဏ်ချမှတ်လိုက်ပြီးတဲ့နေ့မှာတော့ သူတို့အတွက်အယူခံကို ၁လချင်းအလိုက် ရက်တိုးပေးဖို့ တောင်းဆိုခဲ့ရာမှာ ၅ လမြောက်အဖြစ် ထိုင်းအယူခံတရားရုံးက ခွင့်ပြုပေးခဲ့တာပါ။ တရားခံအဖြစ် စွပ်စွဲခံရသူတွေကို စစ်ဆေးမေးမြန်းဖို့အတွက် အကျဉ်းထောင်ထဲမှာ မြန်မာနဲ့ထိုင်း တတ်ကျွမ်းတဲ့သူတွေကို ဘာသာပြန်ဖို့အတွက် ဘန်ခဝမ် အကျဉ်းထောင်ကနေ ခွင့်မပြုတာကြောင့် တရားခံတွေရဲ့အကျိုးဆောင်ရှေ့နေတွေက စစ်ဆေးမေးမြန်းမှုတွေ ထပ်လုပ်နိုင်ဖို့အတွက် နောက်ထပ်ရက်တိုးရနိုင်ဖို့အတွက် စီစဉ်ခဲ့ပါတယ်။
မေလ၂၃ရက်နေ့ထိ အယူခံလျှောက်နိုင်ဖို့ ထပ်တိုးခွင့်ပြု ရတဲ့အခြေအနေနဲ့ ပတ်သက်လို့တရားခံတွေရဲ့အကျိုးဆောင်ရှေ့နေဦးအောင်မျိုးသန့်က အခုလိုပြောပါတယ်။
“၂၃ ရက် ၅ လ ၂၀၁၇ အထိ ၁ လ ထပ်ပြီးတော့တိုးရပါတယ်။ အခုက သူတို့က တင်တောင်းတာဆိုတော့ ၅ ကြိမ်မြောက်ပေါ့နော် ၊ ပြီးခဲ့တဲ့တပတ်လောက်ကတော့ ရှေ့နေများကောင်စီနဲ့ ဘာသာပြန်နဲ့ အယူခံနဲ့ ပတ်သက်တဲ့အကြောင်းအရာတွေကို တရားခံနဲ့ မေးချင်တယ်ဆိုပြီးတော့ ဘန်ခဝမ်ထောင်ကို သွားကြပါတယ်။ အခုသွားတဲ့အချိန်မှာ ဘန်ခဝမ် ထောင်က တာဝန်ရှိတဲ့လူကြီးကနေပြီးတော့ ထိုင်းရှေ့နေတွေကို ပေးဝင်ခွင့်ပေးပြီးတော့ မြန်မာဘာသာပြန်ကိုတော့ ပေးဝင်ခွင့်မပြုခဲ့ပါဘူး။ အဲဒီလိုမပြုလို့ ထိုင်းရှေ့နေများကောင်စီက ထပ်ပြီးတော့ စာတင်ခဲ့တာတွေလည်းရှိပါတယ်။ ဒါကြောင့်မို့ အဲလိုဟာတွေကျတော့ ကလေးတွေဆီမှာ မေးမယ့်ဟာက မြန်မာဘာသာကို ထိုင်းရှေ့နေများကောင်စီနဲ့ တိုက်ရိုက်မလုပ်နိုင်ပဲနဲ့ ဘာသာပြန်ကိုခွင့်မပြုတာကြောင့်မို့လို့ အဲဒီတုန်းက ဆောင်ရွက်ရမယ့်အချက်အလက်တွေအားလုံးဟာ ဆောင်ရွက်ခြင်းမရှိနိုင်ပဲနဲ့ ဒါကြောင့်မို့ အခုလို အယူခံအချိန်မှာ အချိန်မှီမတင်နိုင်ဘူးဆိုတာ ဖြစ်သွားတာပါ။”
အယူခံရုံးကတော့ ဒီလိုထပ်တိုးတောင်းဆိုမှုနဲ့ ပတ်သက်လို့ နောက်ဆုံး အကြိမ်အဖြစ် ခွင့်ပြုပေး ခဲ့တယ်လို့လဲ ဆက်ပြောပြပါတယ်။
“တရားရုံးကလည်းပြောလိုက်ပါတယ် ၊ ဒီဟာက နောက်ဆုံးအကြိမ်ခွင့်ပြုတာလို့ ပြောလိုက်ပါတယ်။ ဒါပေမယ့် အန်ကယ်တို့ဘက်က တင်ပြတဲ့အကြောင်းအရာကလည်း ခုနကပြောသလိုပါပဲ အခုဒီလိုထပ်ပြီးရပ်တိုးရတဲ့အကြောင်းအရင်းဟာ ဥပဒေအရ ဘာသာပြန်ခေါ်သွားခွင့်ရှိတဲ့ကိစ္စကို ထောင်ကနေပြီးတော့ ခေါ်ခွင့်မပြုပဲနဲ့ တားဆီးတဲ့အတွက်ကြောင့် လိုအပ်တဲ့အချက်တွေတောင်းဆိုလို့မရဘူး၊ ဆွေးနွေးခွင့်မရခဲ့ဘူး ၊ ဒါကြောင့်ဒီလိုထပ်ပြီးတော့ အယူခံတောင်းတယ်လို့ တင်ပြတာကို တရားရုံးကလက်ခံတာပါ။ အယူခံ တရားရုံးပေါ့။”
မြန်မာရွှေ့ပြောင်းလူငယ်၂ဦးအတွက် အယူခံတရားရုံး ကနေ သေဒဏ်ကို ဆက်လက်အတည်ပြုခဲ့ပြီး အယူခံကိုပယ်ချလိုက်ပြီးတဲ့နောက်မှာတော့ မြန်မာသံရုံးဘက်ကနေ ထိုင်းနိုင်ငံတရားရုံးချုပ်ထိ အယူခံတက်ဖို့ အတွက်ပြင်ဆင်နေခဲ့ကြတာပါ။ ထိုင်းနိုင်ငံက အလုပ်သမားရေးဆောင်ရွက်နေတဲ့ အဖွဲအစည်းတွေ ထိုင်းရှေ့နေများကောင်းစီနဲ့ အတူပူးပေါင်းလုပ်ဆောင်နိုင်ဖို့ အတွက် မြန်မာနိုင်ငံဘက်က ဥပဒေနဲ့ မူခင်းဆိုင်ရာ အကြံပြုနိုင်တဲ့သူတွေကို လည်းစေလွတ်ခဲ့ပါတယ်။ နေပြည်တော် ပြည်ထောင်စု ရှေ့နေချုပ်ရုံး- ( ညွှန်ကြားရေးမှူးချုပ်ဒေါ်ခင်ချိုအုန်း CID မှုခင်းဌာနက
-CID မှုခင်းဆိုင်ရာကျွမ်းကျင်သူ ရဲမှူးကြီး ဦးစိုးနိုင်ဦး တို့ဟာ မတ်လနောက်ဆုံးပတ်မှာ ထိုင်းနိုင်ငံကိုလာရောက်ပြီး ဒီအမှုနဲ့ပတ်သက်လို့ အသေးစိတ်လေ့လာမူတွေလုပ်ခဲ့ပြီး ထိုင်းရှေ့နေများကောင်စီနဲ့ လည်းတွေဆုံခဲ့တာပါ။ ဒီအတွက်မေလ ၂၃ရက်နေ့ အမှီတော့ ထိုင်းနိုင်ငံတရားရုံးချုပ်ကို အယူခံတင်ဖို့ကြိုးစာသွားမှာဖြစ်တယ်လို့ လည်း ရှေနေဦးအောင်မျိုးသန့်က ပြောပါတယ်။
အခုအယူခံရဲ့ နောက်ထပ်တလ ထပ်တိုးရတဲ့အတွက် တရားခံတွေဖြစ်တဲ့ မြန်မာလူငယ် ၂ ဦးကို စစ်ဆေးမေးမြန်းနိုင်ဖို့ ဘန်ခဝမ်အကျဉ်းထောင်ကို ထပ်မံသွားရောက်နိုင်ဖို့ ရှိနေပြီး အကျဉ်းထောင်က ခွင့်ပြုမပြုဆိုတာကိုတော့ အခြေအနေမသိရသေးဘူးလို့ဆိုပါတယ်။
“အဲဒီအခါမှာ ဘာသာပြန်ခေါ်ပြီးတော့သွားမယ်။ အရင် လိုပဲ တားမလား၊ မတားဘူးလားတော့ မသိဘူး။ သက်ဆိုင်ရာတွေ ကိုတော့ ရှေ့နေများကောင်စီ ကနေစာတင်ပေးတာ ၊ ဒီလိုတော့မဖြစ်သင့်ဘူး ဒါဟာ ထိုင်းလူမျိုး မဟုတ်ဘူး မြန်မာတရားခံတွေဖြစ်တဲ့ အတွက် မြန်မာတရားခံတယောက်ကို စကားပြောတဲ့အခါမှာ ဘာသာပြန်လိုတယ် ဆိုပြီး သူတို့ကို တင်ထားပြီး စားရေးထားပါတယ်။”
မြန်မာနိုင်ငံက ဥပဒေပညာရှင်တွေနဲမူခင်းဆိုင်ရာကျွမ်းကျင်သူတွေဟာ မတ်လ ၂၆ ရက်နေကနေ မတ် ၂၉ ရက်ထိ ထိုင်းနိုင်ငံကို လာရောက်ခဲ့တဲ့ ၄ရက်တာခရီးစဉ်အတွင်းမှာ လိပ်ကျွန်းလူသတ်မူနဲ့ ပတ်သက်လို့ သေဒဏ်ပေးခံထား ရတဲ့မြန်မာ လူငယ် ၂ဦးကိုလည်းတွေဆုံခဲ့ပါတယ်။ မတ်လ ၂၈ ရက်နေ့ မှာတော့ မြန်မာရွေပြောင်း လူငယ်၂ဦးရဲ့အယူခံအတွက်ပြင်ဆင်မူတွေ ကို မြန်မာသံရုံး ကိုယ်စားပြု ရှေနေဦးအောင်မျိုးသန့်နဲ့ အတူ ပူးပေါင်းပြင်ဆင်မူတွေလုပ်ခဲ့တာပါ။
မြန်မာရွှေ့ပြောင်းအလုပ်သမား ခန့်မှန်းချေ ၄,၀၀၀ လောက် အလုပ်လုပ်ကိုင်နေတဲ့ လိပ်ကျွန်းမှာ ၂၀၁၄ ခုနှစ် စက်တင်ဘာ ၁၅ ရက်နေ့က လူသတ်မှုဖြစ်ပွားခဲ့ပြီး ရက်ပိုင်းအတွင်းမှာပဲ ဖမ်းဆီးခံရတဲ့ မြန်မာလူငယ် ၂ ယောက်ကတော့ သတ်ဖြတ်မှုတွေကို ကျူးလွန်ကြောင်းအစောပိုင်းတုန်းက ဝန်ခံပြော ဆိုခဲ့ပေမယ့် နောက်ပိုင်းမှာတော့ ရဲတွေရဲ့နှိပ်စက် မှု တွေကြောင့် ဖြောင့်ချက်ပေးခဲ့ ရတာ ဖြစ်တဲ့အကြောင်း တရားရုံးမှာ ထွက်ဆိုခဲ့တာပါ။
၂၀၁၄ ခုနှစ် စက်တင်ဘာလကုန်ပိုင်းမှာ တော့ လူသတ်မူနဲ့ တရားစွဲဆိုခံခဲ့ရတဲ့ မြန်မာလူငယ် ၂ ဦးကိုတော့ တနှစ်ကျော်ကြာ ထိုင်းနိုင်ငံကော့စမွေ အကျဉ်းထောင်မှာ ဖမ်းဆီးထားပြီး ၂၀၁၅ခုနှစ်ကုန်မှာ ထိုင်းနိုင်ငံကောစမွေတရားရုံးကနေ အမူ ၇မူနဲ့အမြင့်ဆုံးပြစ်ဒဏ်အဖြစ်သေဒဏ်ပေးခဲ့ပြီးဘန်ခွမ်အကျဉ်းထောင်မှာ ထိန်းသိမ်းထားပါတယ်။ သူတို့လွှတ်မြောက်ရေးအတွက် မျှတစွာစီရင်နိုင်ဖို့အတွက် မြန်မာနိုင်ငံတဝှမ်း ဆန္ဒပြပွဲကြီးတွေ အကြီးအကျယ်ဖြစ်ပွားခဲ့ကာ ရခိုင်ပြည်နယ်အတွင်းက မြို့နယ် ၁၅ မြို့နယ်က လူထုအင်အား ၁ သိန်းခန့်ဟာလည်း ထိုင်းဘုရင်မင်းမြတ်နဲ့ ထိုင်းအစိုးရကို လက်မှတ်ရေးထိုးထားတဲ့ မေတ္တာလက်ခံစာ ၁ စောင်လည်း ပေးပို့ထားပါတယ်။
