ကင်ညာ အကြမ်းဖက် တိုက်ခိုက်မှု သေဆုံးသူ မြင့်တက်

ကင်ညာနိုင်ငံ၊ နိုင်ရိုဘီမြို့တော်ထဲက ဇိမ်ခံပစ္စည်းတွေရောင်းတဲ့ အရောင်းစင်တာကို လက်နက်အမြောက်အများ ကိုင်ဆောင်ထားတဲ့ သေနတ်သမားတွေက ဝင်ရောက် စီးနင်း ပစ်ခတ်တဲ့အတွက် လူပေါင်း ၄၀ လောက် သေဆုံးခဲ့တယ်လို့ ကင်ညာသမ္မတက ပြောပါတယ်။

ဒီတိုက်ခိုက်မှုအတွင်း လူပေါင်း ၁၅၀ လောက်လည်း ဒဏ်ရာရသွားပါတယ်။ ဆိုမာလီ အကြမ်းဖက်အုပ်စု တခုဖြစ်တဲ့ al-Shabab အဖွဲ့က ဒီတိုက်ခိုက်မှုကို သူတို့လုပ်တာဆိုပြီး ပြောပါတယ်။ တိုက်ခိုက်မှုအပြီး နာရီပိုင်းအကြာမှာပဲ မနေ့က စနေနေ့မှာ သမ္မတ အူဟူရူ ကန်ယတ်တ (Uhuru Kenyatta) က အခုလို ဖြစ်ပွားခဲ့တာတွေနဲ့ ပတ်သတ်ပြီး တိုင်းပြည်ကို အားပေးနှစ်သိမ့်ခဲ့ပါတယ်။

ဒီတိုက်ခိုက်မှုဟာ သူရဲဘောကြောင်သူတွေရဲ့ လုပ်ရပ်ဖြစ်တယ်လို့ သမ္မတက ပြောဆိုပြီး ကင်ညာ ပြည်သူတွေ အနေနဲ့ အကြမ်းဖက်သမားတွေရဲ့ ဒီခြိမ်းခြောက်မှုအပေါ် ရင်ဆိုင်နိုင်တဲ့ စည်းလုံးညီညွတ်မှု အတွက် ချီးကျူးပြောဆိုပါတယ်။

သမ္မတက Kenyatta က ဒီသူရဲဘောကြောင်သူတွေကို မိအောင်ရှာပြီး တရားဥပဒေအရ အရေးယူမယ်လို့ ကတိပြုသွားခဲ့ပါတယ်။ အစိုးရအနေနဲ့လည်း တိုင်းပြည်ရဲ့ ပြည်တွင်းပြည်ပက တိုက်ခိုက်မှုတွေကိုကာကွယ်ဖို့ အဆင့်သင့်ရှိနေကြောင်းလည်း ပြောပါတယ်။

မကြာခဏ နယ်စပ်ကို ဖြတ်ကျော်ပြီး ဝင်ရောက်တိုက်ခိုက်လေ့ရှိတဲ့ al-Shabab အဖွဲ့ဝင် စစ်သွေးကြွတွေကို ချေမှုန်းဖို့ ကင်ညာတပ်ဖွဲ့ဝင်တွေဟာ လွန်ခဲ့တဲ့ ၂ နှစ်က ဆိုမာလီယာ နိုင်ငံအတွင်း ဝင်ရောက်ခဲ့ဖူးပါတယ်။

နိုင်ငံမြိုေတော်မှာရှိတဲ့ကုန်တိုက်အတွင်း လူစည်ကားတဲ့အချိန်မှာ သေနတ်သမားတွေဟာ လက်ပစ်ဗုံးတွေ သေနတ်တွေနဲ့ ပစ်ခတ်တိုက်ခိုက်ခဲ့တာ ဖြစ်ပါတယ်။ တိုက်ခိုက်မှုကြောင့် ကလေးသူငယ်အချို့ ဒဏ်ရာရခဲ့တဲ့အပြင် ပြင်သစ်နိုင်ငံသား ၂ ဦးလည်း သေဆုံးခဲ့တဲ့အကြောင်း ပြင်သစ်ဘက်က ပြောပါတယ်ခင်ဗျာ။