IS အစ္စလာမ်အစွန်းရောက်တွေ နောက်ဆုံးခြေကုပ်ယူ ထိန်းချုပ်ထားတဲ့ နေရာမှာ IS အုပ်စုကို ၁၀၀ ရာခိုင်နှုန်း နှိမ်နင်းနိုင်တဲ့အကြောင်း သောကြာနေ့မှာ အမေရိကန်သမ္မတ Donald Trump က ကြေညာခဲ့ပြီး မကြာခင်မှာပဲ မြေပြင်မှာ ထိုးစစ်ဆင်နေတဲ့ အမေရိကန်ထောက်ခံပံ့ပိုးပေးထားတဲ့ တပ်ဖွဲ့ဝင်တွေကတော့ Trump ရဲ့ အဆိုကို ငြင်းဆန်ခဲ့ပါတယ်။
ဖလော်ရီဒါကို သွားတဲ့ခရီး Air Force One လေယာဉ်ပေါ်မှာ ယာယီကာကွယ်ရေးဝန်ကြီး Pat Shanahan နဲ့ တွေ့ဆုံအပြီးမှာ သမ္မတ Trump က အခုလို ပြောလိုက်တာ ဖြစ်ပါတယ်။ ဆီးရီးယားနိုင်ငံတွင်း IS တို့ လုံး၀ မရှိတော့ဘူးဆိုတာ ဖော်ပြတဲ့ မြေပုံကို Trump က သတင်းထောက်တွေကို ပြခဲ့ပါတယ်။
IS ကို ဆီးရီးယားနိုင်ငံတွင်းက နှိမ်နင်းနိုင်ပြီလို့ အိမ်ဖြူတော် ပြောခွင့်ရ Sarah Sanders က ဖြည့်စွက်ပြောခဲ့ပါတယ်။ IS လွှမ်းမိုးမှု အများဆုံးအချိန် ၂၀၁၄ ခုနှစ်တုန်းက ဆီးရီးယားမှာ Raqqa နဲ့ အီရတ်မှာ မိုဆူးလ် ဆိုပြီး အဓိကနေရာ ၂ ခု၊ ၂ လိုင်းခွဲပြီး IS က လွှမ်းမိုးခဲ့တာပါ။
မြေပြင်မှာ စစ်ဆင်နေတဲ့ မိတ်ဖက်တွေနဲ့အတူ အမေရိကန်ဦးဆောင်တဲ့ နိုင်ငံတကာ ညွှန့်ပေါင်းတပ်တွေက IS အဖွဲ့ ထိန်းချုပ်ထားတဲ့ ဒေသတွေကို ပြန်သိမ်းဖို့ အဲဒီအချိန်ကစပြီး ကြိုးပမ်းခဲ့တာပါ။
ဆီးရီးယားအရှေ့မြောက်ပိုင်း Baghuz မြို့က နေရာတချို့ဟာ IS တို့ ထိန်းချုပ်ထားတဲ့ နောက်ဆုံးနေရာ ဖြစ်ပါတယ်။ အမေရိကန်ဦးဆောင်တဲ့ ညွှန့်ပေါင်းတပ်ဖွဲ့တွေက IS တို့ရဲ့ လက်ကျန်ဒေသကို ပစ်မှတ်ထားပြီး လေကြောင်းတိုက်ခိုက်မှု အသစ်တသုတ် ထိုးစစ်ဆင်ပြီးနောက် ကြာသတေးနေ့နှောင်းပိုင်းနဲ့ သောကြာနေ့မနက် အစောပိုင်းမှာတော့ IS တို့ ထိန်းချုပ်မှု လျော့နည်းလာခဲ့တာပါ။
