အီရတ်နိုင်ငံ ဘဂ္ဂဒက် (Baghdad) မြို့တော်က အကြီးဆုံး ဆူနီဗလီတခုမှာ ရာမန်ဒန် ဥပုသ်လအတွက် အထူးဝတ်ပြု ဆုတောင်းမှုတွေ ကျင်းပနေချိန် ဗလီထဲမှာ အသေခံ ဗုံးခွဲသမားတဦးက သူ့ဘာသာသူ ဖောက်ခွဲပစ်ခဲ့တာကြောင့် လူ ၂၈ ဦး သေဆုံးပြီး တခြား ၃၇ ဦး ဒဏ်ရာရရှိသွားပါတယ်။
ဖောက်ခွဲမှုက ဘဂ္ဂဒက်မြို့တော်မှာရှိတဲ့ ခေါင်းမိုးခုံးအပြာနဲ့ Um al-Qura ဗလီမှာ တနင်္ဂနွေနေ့က ဖြစ်ပွားခဲ့တာလို့ ပြည်ထဲရေး ဝန်ကြီးဌာန အရာရှိတွေက ပြောကြပါတယ်။
နိုင်ငံအနောက်ပိုင်း အန်ဘာ (Anbar) ပြည်နယ်က ဆူနီအမတ်တဦးဖြစ်တဲ့ မစ္စတာ ခါလစ် အယ်လ် ဖာဒါဝီ (Mr. Khalid al-Fahdawi) လည်း သေဆုံးသူတွေထဲ ပါသွားတယ်လို့ ပြည်ထဲရေး အရာရှိတွေက ပြောတာပါ။
ရာမန်ဒန် ဥပုသ်လကုန်ဖို့ ရက်ပိုင်းအလိုမှာပဲ အခုလို တိုက်ခိုက်မှု ဖြစ်ပွားတာဖြစ်ပြီး ဘယ်သူကမှ ဒီတိုက်ခိုက်မှုကို သူတို့လုပ်တာလို့ ပြောမလာသေးပါဘူး။ တနေ့တည်းပဲ နောက်ထပ် တိုက်ခိုက်မှု တခုကြောင့်လည်း လူ ၄ ဦးမက သေဆုံးသွားရပါတယ်။
အီရတ်နိုင်ငံမှာ အကြမ်းဖက်မှုတွေက ၂၀၀၆ နဲ့ ၂၀၀၇ ခုနှစ်တွေမှာ အဆိုးဆုံးဖြစ်ပြီး အခုထိတော့ တိုက်ခိုက်မှုတွေ အဖြစ်များနေဆဲပါပဲ။ အမေရိကန်တပ်တွေ ဒီနှစ်ကုန်မှာ အီရတ်က ရုပ်သိမ်းသွားတဲ့အခါ လုံခြုံရေးအတွက် အီရတ်တို့ သေချာ တာဝန်ယူနိုင်ပါ့မလား ဆိုတာကို ပူပန်ကြောင်း အမေရိကန်နဲ့ အီရတ် အရာရှိတွေက ပြောနေကြပါတယ်။
