မိခင်ဖြစ်သူကနေ တဆင့် ကလေးကို ခုခံအားကျဆင်းမှု ကူးစက်ရောဂါ HIV ဗိုင်းရပ်စ်နဲ့ ကာလသားရောဂါ ကူးစက်မှု လုံး၀ ကင်းရှင်းတဲ့ နိုင်ငံတွေ အဖြစ် ထိုင်း၊ အာမေးနီးယား၊ ဘဲလာရုစ်နဲ့ Moldova နိုင်ငံတွေကို ကမ္ဘာ့ကျန်းမာရေး အဖွဲ့ကြီး WHO က ဒီကနေ့ ကြေညာလိုက်ပါတယ်။
ပြီးခဲ့တဲ့ နှစ်တုန်းက ကျူးဘားနိုင်ငံဟာ မိခင်ဖြစ်သူကနေ ရင်သွေးကို HIV နဲ့ ဆစ်ဖလစ် - ကာလသားရောဂါ ကူးစက်မှု လုံး၀ ကင်းရှင်းတဲ့ ပထဆုံး နိုင်ငံ ဖြစ်ခဲ့ပြီး ဒီကနေ့မှာ နောက်ထပ် နိုင်ငံ လေးခုတို့ ကင်းရှင်းတဲ့ နိုင်ငံတွေ ဖြစ်ကြောင်း WHO က ကြေညာလိုက်တာ ဖြစ်ပါတယ်။
မိခင်ဖြစ်သူကနေ ရင်သွေးကို HIV ဗိုင်းရပ်စ်နဲ့ ဆစ်ဖလစ် - ကာလသား ရောဂါ ကူးစက်မှု လုံး၀ ကင်းရှင်း ပပျောက်ရေး ဆောင်ရွက်နိုင်ခဲ့တဲ့ အပေါ်မှာလည်း ဒီ လေးနိုင်ငံတို့ကို ကမ္ဘာ့ကျန်းမာရေး အဖွဲ့ကြီး WHO က ချီးကျူး ဂုဏ်ပြုပါတယ်။ ၂၀၃၀ ပြည့်နှစ် အရောက်မှာ လိင်ဆက်ဆံမှုကနေ တဆင့် ကူးစက်တဲ့ ရောဂါတွေနဲ့ AIDS ကူးစက်မှုကို လုံး၀ အမြစ်ဖြတ် ချေမှုန်းရေး ကမ္ဘာတလွှား ဆောင်ရွက်မှုတွေမှာ မိခင်ကနေ ရင်သွေးကို HIV နဲ့ ကာလသား ရောဂါ ကူးစက်မှု လုံး၀ အမြစ်ပြတ် ချေမှုန်းရေးက အရေးပါပါတယ်။
ဒီ ၄ နိုင်ငံ အနေနဲ့ ကိုယ်ဝန်ဆောင်ကာလ စောင့်ရှောက်မှု၊ ကိုယ်ဝန်ဆောင် အမျိုးသမီးတွေနဲ့ မိဘ ဖြစ်သူတွေကို HIV နဲ့ ကာလသား ရောဂါ စစ်ဆေးမှုတွေ လုပ်ဆောင်ခဲ့ပြီး ကူးစက်ထားတဲ့ အမျိုးသမီးတွေနဲ့ မွေးဖွားလာတဲ့ ကလေးငယ်တွေကို ကုသရေးတို့ကို အစွမ်းကုန် အားထုတ် ကြိုးစားခဲ့ကြတယ်လို့လည်း ကမ္ဘာ့ကျန်းမာရေး အဖွဲ့ကြီးရဲ့ ကြေညာချက်မှာ ဖော်ပြပါတယ်။
