မြန်မာနိုင်ငံဟာ အရေးကြီးတဲ့ ပြုပြင်ပြောင်းလဲရေးကို ဖော်ဆောင်နေပြီး အချိန်ယူဖြေရှင်းရမယ့် စိန်ခေါ်အကဲစမ်းမှုတွေနဲ့ ရင်ဆိုင်နေရတယ်လို့ အမေရိကန်နိုင်ငံခြားရေဝန်ကြီး John Kerry ကပြောလိုက်ပါတယ်။ အမေရိကန်နဲ့ မြန်မာဆက်ဆံရေးမှာ အမေရိကန်ပြည်ထောင်စုက တောင်းဆိုနေတာတွေကို မြန်မာအစိုးရက လိုက်လုပ်ပေးဖို့မဟုတ်ဘဲ မြန်မာပြည်သူတွေအတွက် ဖြစ်နိုင်ခြေရှိတဲ့ အလားအလာတွေကို ဖြည့်ဆည်းပေးဖို့ ဖြစ်တယ်လို့လည်း ဆိုပါတယ်။ ဒီကနေ့ သြဂုတ်လ (၁၀) ရက်နေ့မှာ ကျင်းပတဲ့ အမေရိကန်နိုင်ငံခြားရေးဝန်ကြီးရဲ့ သတင်းစာရှင်းလင်းပွဲမှာ ပြောဆိုလိုက်တာပါ။ နေပြည်တော်ရောက် ဒေါ်ခင်စိုးဝင်းက သတင်းပေးပို့ထားပါတယ်။
သမ္မတအိုဘားမားအစိုးရဟာ မြန်မာအစိုးရနဲ့ဆက်ဆံတဲ့နေရာမှာ သဘောထားပျော့ပျောင်းလွန်းတယ်လို့ ပြောကြပြီးတော့ အမေရိကန် လွှတ်တော် အမတ်တွေ ပါးလိုက်တဲ့အမှာစကားကို ထိထိရောက်ရောက် လက်ဆင့်ကမ်းနိုင်ပါမလားဆိုတဲ့ ဝေဖန်မှုတွေနဲ့ပတ်သက်ပြီး အမေရိကန်နိုင်ငံခြားရေးဝန်ကြီး ဂျွန်ကယ်ရီက အခုလို တုံ့ပြန်လိုက်ပါတယ်။
“မြန်မာခေါင်းဆောင်တွေအပေါ် မျက်စိမှိတ်ယုံစားပြီး ဆက်ဆံနေတာမဟုတ်ပါဘူး။ မသိနားမလည်လို့လည်း မဟုတ်ပါဘူး။ မြန်မာနိုင်ငံရင်ဆိုင်နေရတဲ့ စိန်ခေါ်မှုတွေ အများကြီးကို စာရင်းလုပ်ပြီး ယူလာခဲ့တာပါ။ ဒီစိန်ခေါ်ချက်တွေ တစ်ခုချင်းစီကို အိမ်ရှင်ခေါင်းဆောင်တွေနဲ့ အသေးစိတ်ဆွေးနွေးခဲ့ပါတယ်။ ပွင့်ပွင့်လင်းလင်း တိုက်ရိုက် ပြောဆိုနိုင်ခဲ့ပါတယ်။ ပြည်တွင်းစစ် အဆုံးသတ်ရေး၊ တိုင်းရင်းသားလူနည်းစုတွေအရေး၊ ရခိုင်ပြည်နယ်အရေး၊ ဖွဲ့စည်းပုံ အခြေခံဥပဒေ ပြင်ဆင်ရေး၊ လူထုအတွက် ဒီမိုကရေစီနဲ့အညီ ဥပဒေတွေ ပြင်ဆင်ရေး စတာတွေကို ထောက်ပြ ပြောဆိုနိုင်ခဲ့ပါတယ်။”
မြန်မာနိုင်ငံရဲ့ပြုပြင်ပြောင်းလဲမှု နောက်ကြောင်းပြန်လှည့်နိုင်တဲ့ လက္ခဏာကြောင့် အမေရိကန်နဲ့မြန်မာ ဆက်ဆံရေးကို ပြန်လည်သုံးသပ်ဖို့ တိုက်တွန်းချက်တွေအပေါ် သမ္မတအိုဘားမားအစိုးရရဲ့ရပ်တည်ချက်ကို ဝန်ကြီးကယ်ရီက အခုလို ရှင်းပြပါတယ်။
“ဒီလိုလုပ်မှ ရမယ်။ ဒီလိုလုပ်မှ ဖြစ်မယ်လို့ အမိန့်ပေးနေလို့ လိုချင်တဲ့ အဖြေမဟုတ်ပါဘူး။ သူတို့ရဲ့ သမိုင်းယဉ်ကျေးမှု ကိုးကွယ်ရာဘာသာ ယုံကြည်မှုတွေ ရှိတဲ့ အများပြည်သူနေတဲ့ နိုင်ငံတစ်နိုင်ငံဖြစ်ပါတယ်။ သူတို့မှာ အားကျ အတုယူစရာတွေ၊ အတွေးအခေါ်တွေ အသီးသီး ရှိကြပါတယ်။ ဒီလို အံ့သြစရာ ကောင်းတဲ့ ခရီးရောက်အောင် အတော်လေး လျှောက်လှမ်းခဲ့ကြရတာပါ။ ကျနော်တို့ရောက်စေချင်တဲ့အထိ လျှောက်ဖို့တော့ လိုပါသေးတယ်။ အမေရိကန် အစိုးရက အမျှော်အမြင်ကြီးကြီးနဲ့ မြန်မာအစိုးရကို ဆက်ဆံနေတာပါ။ ပိတ်ဆို့မှုတွေ အားလုံးမဟုတ်ပေမယ့် တချို့ကို ရုပ်သိမ်းပေးပြီး ဖြစ်ပါတယ်။ အခြေခံအားဖြင့်တော့ အစိုးရသစ်တစ်ရပ်အနေနဲ့ အားလုံးကို အဆင်ပြေချောမွေ့စွာ ကိုင်တွယ်နိုင်သေးတာတော့ မဟုတ်ပါဘူး။ ဒါတွေကို ဒေါ်အောင်ဆန်းစုကြည်နဲ့ တွေ့တဲ့အခါမှာလည်း ပြောပြဦးမှာပါ။ ကျနော်ကတော့ ဘာပဲပြောပြော ဒေါ်အောင်ဆန်းစုကြည်နောက်က ထောက်ခံပေးမှာပါ။”
မြန်မာပြည်အတွင်း လတ်တလောရင်ဆိုင်နေရတဲ့ ဘာသာရေး၊ လူမျိုးရေးအကြမ်းဖက်မှုတွေ၊ တိုင်းရင်းဒေသတွေမှာ ငြိမ်းချမ်းရေးမရသေးတာတွေနဲ့ ရခိုင်ပြည်နယ်အရေး စတာတွေကို အသေးစိတ်ဆွေးနွေးခဲ့ပြီး မြန်မာခေါင်းဆောင်တွေဘက်ကလည်း အဲဒီပြဿနာတွေ ရှိနေတဲ့အကြောင်း အသိအမှတ်ပြုတာမို့ အမေရိကန်ပြည်ထောင်စုအနေနဲ့ ဒီအခက်အခဲတွေကို ဖြေရှင်းရာမှာ ဝိုင်းဝန်း ကူညီ အားပေးသွားမယ့်အကြောင်းလည်း ပြောပါတယ်။
“မြန်မာနိုင်ငံဟာ အရေးကြီးတဲ့ ပြုပြင်ပြောင်းလဲရေးကို ဖော်ဆောင်နေပါတယ်။ အချိန်ယူပြီးဖြေရှင်းရမယ့် စိန်ခေါ်မှုတွေနဲ့လည်း ရင်ဆိုင်နေရပါတယ်။ မြန်မာပြည်သူတွေထဲမှာလည်း ဒီအပြောင်းအလဲကို မလိုချင်တဲ့သူတွေ ရှိနိုင်သလို တချို့ကလည်း အပြောင်းအလဲကို တစိုက်မတ်မတ် လိုချင်တဲ့ဆန္ဒနဲ့ ကြိုးစားနေတဲ့ သူတွေလည်း ရှိပါတယ်။ ဒါကြောင့် ရွေးကောက်ပွဲ ကျင်းပပေးရမှာပါ။ အခုအမေရိကန်နဲ့ မြန်မာဆက်ဆံရေးမှာ အမေရိကန်က တောင်းဆိုနေတာတွေကို မြန်မာနိုင်ငံက နေ့စဉ် လိုက်လုပ်ပေးဖို့ မဟုတ်ပါဘူး။ ပြည်သူတွေအတွက် ဖြစ်နိုင်ခြေရှိတဲ့ အလားအလာကို နိုင်ငံအနေနဲ့ ဖြည့်ဆည်းပေးဖို့ပဲ ဖြစ်ပါတယ်။”
ပြည်ထောင်စုလွှတ်တော် ဥက္ကဋ္ဌသူရဦးရွှေမန်းကို အမေရိကန် လွှတ်တော်အမတ်တွေနဲ့ တိုက်ရိုက်တွေ့ဆုံ ဆွေးနွေးနိုင်ပါရန် အမေရိကန်ပြည်ထောင်စုကို လာရောက်ဖို့လည်း ဝန်ကြီး Kerry က ဖိတ်ကြားခဲ့ပါတယ်။
အမေရိကန်နိုင်ငံခြားရေးဝန်ကြီး ဂျွန်ကယ်ရီဟာ ဒီကနေ့ညနေပိုင်းမှာ နေပြည်တော်ကနေ ရန်ကုန်မြို့ကို ထွက်ခွာပြီးတော့ ရန်ကုန်မြို့မှာ အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်နဲ့လည်း တွေ့ဆုံမှာဖြစ်ပါတယ်။
