အမေရိကန်သမ္မတဟောင်း Barack Obama လက်ထက်က ပတ်ဝန်းကျင်ထိန်းသိမ်းရေးဆိုင်ရာ စည်းမျဉ်းစည်းကမ်းတွေကို ဖျက်သိမ်းတဲ့ အမိန့်တရပ်ကို သမ္မတ Donald Trump က လက်မှတ်ရေးထိုး ထုတ်ပြန်လိုက်ပြီး နောက်တနေ့ဖြစ်တဲ့ ဒီကနေ့မှာပဲ၊ ပြင်သစ်နိုင်ငံ ပဲရစ်မြို့က ရာသီဥတုဆိုင်ရာ သဘောတူညီချက်ကို လေးစားလိုက်နာသွားမှာဖြစ်ကြောင်း တရုတ်နိုင်ငံက ပြောဆိုလိုက်ပါတယ်။
ရာသီဥတု ဖောက်ပြန်မှုတွေရဲ့ စိန်ခေါ်မှုတွေကို တကမ္ဘာလုံး ရင်ဆိုင်နေရပြီး၊ တခြားအစိုးရတွေက မူဝါဒတွေ ပြောင်းပေမဲ့လည်း တရုတ်နိုင်ငံကတော့ ပြောင်းလဲမှာ မဟုတ်တဲ့အကြောင်း တရုတ်နိုင်ငံခြားရေး ဝန်ကြီးဌာန ပြောခွင့်ရသူ Lu Kang က ပြောဆိုခဲ့တာပါ။
သမ္မတအမိန့်ကြောင့် ကမ္ဘာ့ရာသီဥတုအပေါ် လူတွေရဲ့လုပ်ရပ်တွေကနေ ရိုက်ခတ်နိုင်တဲ့ အကျိုးဆက်တွေနဲ့ ပတ်သက်လို့ နိုင်ငံရေးအရ ငြင်းခုန်နေတာတွေ တကျော့ပြန် ပေါ်ပေါက်လာသလို၊ ရာသီဥတုဆိုင်ရာ သဘောတူညီချက်တွေ ရရှိဖို့ ဆယ်စုနှစ်တွေနဲ့ချီပြီး တကမ္ဘာလုံးအတိုင်းအတာနဲ့ ဝိုင်းဝန်းကြိုးပမ်းမှုတွေ ဆုံးရှုံးမှာကို စိုးရိမ်မှုတွေလည်း ထွက်ပေါ်လာပါတယ်။
သမ္မတ Trump ကတော့ ကျောက်မီးသွေး တူးဖော်မှုတွေ ပြန်လည်လုပ်ဆောင်မှာဖြစ်ပြီး၊ သန့်ရှင်းတဲ့ကျောက်မီးသွေး ထုတ်လုပ်မယ်လို့ မနေ့တုန်းက သမ္မတအမိန့်ကို လက်မှတ်ရေးထိုးချိန်မှာ ပြောဆိုခဲ့တာပါ။
သမ္မတရဲ့ အမိန့်ကြောင့် ကြိုးပမ်းခဲ့သမျှတွေအားလုံး ပျက်စီးကုန်လိမ့်မယ်လို့ မြင်နေကြသလို၊ သိပ္ပံပညာရှင်တွေလည်း သဘောကျမှာ မဟုတ်ဘူးလို့လည်း ကမ္ဘာ့အိုဇုန်းလွှာပျက်စီးမှုနဲ့ ပတ်သက်တဲ့ သုတေသနလေ့လာချက်ကြောင့် ၁၉၉၅ ခုနှစ်မှာ နိုဘဲလ်ဆု ရရှိထားတဲ့ နယ်သာလန်နိုင်ငံက သုတေသီ Paul Crutzen က ဗွီအိုအေကို ပြောပါတယ်။ သမ္မတအိမ်ဖြူတော် ပြောခွင့်ရသူ Sean Spicerကတော့ ပတ်ဝန်းကျင်ကို ထိန်းသိမ်းစောင့်ရှောက်ရင်း အမေရိကန်မှာ စွမ်းအင်တိုးမြှင့်ထုတ်လုပ်နိုင်လိမ့်မယ်လို့ သမ္မတ Trump က ယုံကြည်ထားကြောင်းလည်း ပြောဆိုခဲ့ပါတယ်။
