ဗုဒ္ဓမြတ်စွာဘုရား ဟောကြားခဲ့တဲ့ ပိဋက ၃ ပုံဆိုင်ရာ ညီလာခံကို တိဘက် ဘာသာရေးခေါင်းဆောင် ဘုန်းတော်ကြီး ဒလိုင်း လားမားက အိန္ဒိယနိုင်ငံ၊ Bihar ပြည်နယ်မှာရှိတဲ့ ဗုဒ္ဓဂါယာမှာ ဒီဇင်ဘာ ၂၂ ရက်၊ စနေနေ့ ဖွင့်လှစ်ပေးလိုက်ပါတယ်။
၂ ရက်ကြာ ကျင်းပမယ့် ဒီ ညီလာခံကို ဘုန်းတော်ကြီး ဒလိုင်း လားမားက အဖွင့်မိန့်ခွန်းပြောကြားခဲ့ပြီး - ဘာသာရေးအရ သည်းခံမှုတရား ထွန်းကားရေးအတွက် ရည်ရွယ်ပြီး ဗုဒ္ဓဘာသာရဲ့ အဓိက ဂိုဏ်းကြီး ၂ ခုဖြစ်တဲ့ မဟာယနနဲ့ ဟိနာယနအကြား ကွဲပြား ခြားနားမှု မရှိဆိုတာကို အဓိကထား ဆွေးနွေး ကြမှာဖြစ်ကြောင်း ရိုက်တာ သတင်းမှာ ဖော်ပြထားပါတယ်။
ဒီ ညီလာခံကို မြန်မာ၊ ထိုင်း၊ မွန်ဂိုလီးယား၊ တောင်ကိုရီးယား၊ ဗြိတိန် စတဲ့ နိုင်ငံပေါင်း ၁၁ နိုင်ငံက ကိုယ်စားလှယ်တွေ တက်ရောက်ကြကြောင်း ထိုင်း-အိန္ဒိယ ချစ်ကြည်ရေးအဖွဲ့ အတွင်းရေးမှူး Ratneshwar Chakma က ပြောပါတယ်။
ဗုဒ္ဓဘာသာအတွင်း ဂိုဏ်းတွေ ကွဲပြားနေပေမယ့်လည်း အားလုံးဟာ အတူတူဘဲ ဖြစ်ကြောင်း၊ မြတ်စွာဘုရားရဲ့ ဟောကြားချက်တွေဟာ လူသားအားလုံး ကောင်းမွန်ရေးအတွက် ဖြစ်ကြောင်း၊ မဟာယနနဲ့ ဟိနာယနအကြား ကွဲပြား ခြားနားမှု မရှိကြောင်း၊ အဲဒီ ၂ ခုအကြား ကွဲပြားမှု မရှိဘူးဆိုတဲ့ကိစ္စကို ဆွေးနွေးကြမှာ ဖြစ်ကြောင်း Ratneshwar Chakma က ပြောပါတယ်။
တိဘက် ဘာသာရေးခေါင်းဆောင် ဘုန်းတော်ကြီး ဒလိုင်း လားမားဟာ တိဘက်ပြည်ကို တရုတ်တို့က ဝင်ရောက် သိမ်းပိုက်ပြီးတဲ့နောက်ပိုင်း တရုတ်တို့ရဲ့ အုပ်ချုပ်မှုကို တွန်းလှန်နိုင်ဖို့ ကြိုးစားတာ မအောင်မမြင် ဖြစ်ခဲ့ပြီးတဲ့နောက် အိန္ဒိယနိုင်ငံဘက်ကို ထွက်ပြေးလာပြီး လက်ရှိမှာ မြောက်ပိုင်း Himachal Pradesh ပြည်နယ်၊ Dharamsala မြို့မှာ အခြေစိုက် သီတင်းသုံးနေတာ ဖြစ်ပါတယ်။
