မြောက်ကိုရီးယားဟာ မြန်မာနဲ့ ဆီးရီးယား နိုင်ငံတွေကို လက်နက်တွေ တင်ပို့ပြီး နိုင်ငံတကာက အရေးယူ ဒဏ်ခတ်မှုတွေကို ချိုးဖောက်တာတွေ ရှိခဲ့တယ်လို့ ကုလသမဂ္ဂရဲ့ အစီရင်ခံစာ တစောင်က ဖော်ပြလိုက်ပါတယ်။
၂၀၀၆ နဲ့ ၂၀၀၉ ခုနှစ်တွေမှာ ချမှတ်ခဲ့တဲ့ ကုလသမဂ္ဂရဲ့ အရေးယူ ဒဏ်ခတ်မှု တွေဟာ မြောက်ကိုရီးယားအပေါ် တားမြစ်ထားတဲ့ လုပ်ရပ်တွေကို မဟန့်တား နိုင်ခဲ့ဘူးလို့လည်း ကုလသမဂ္ဂ ကျွမ်းကျင်သူ ပညာရှင်အဖွဲ့ရဲ့ အစီရင်ခံစာက ဖော်ပြခဲ့တာပါ။ ဒါပေမဲ့လည်း နျူကလီးယား၊ ဓာတု ဇီ၀ လက်နက် နဲ့ တာဝေးပစ်ဒုံးပျံတွေနဲ့ ဆက်နွယ်ပြီး ချိုးဖောက်မှု အသစ်တွေကိုတော့ မတွေ့ရဘူးလို့ ဖော်ပြပါတယ်။
အရေးယူ ဒဏ်ခတ်မှုတွေကို စောင့်ကြည့်နေတဲ့ ကုလသမဂ္ဂ လုံခြုံရေး ကောင်စီရဲ့ ကော်မီတီတရပ်ကို တင်သွင်းတဲ့ စာမျက်နှာ ၇၄ မျက်နှာရှိတဲ့ ကုလသမဂ္ဂရဲ့ အစီရင်ခံစာ ကိုတော့ တရုတ်နိုင်ငံရဲ့ ကန့်ကွက်မှုတွေကြောင့် ကြန့်ကြာနေခဲ့ပြီး သောကြာနေ့ကမှ တရားဝင် ထုတ်ပြန်ခဲ့တာပါ။ တရုတ်နိုင်ငံဟာ မြောက်ကိုရီးယား အပေါ် တားမြစ်ထားတဲ့ ပစ္စည်းတွေကို တဆင့်ခံ တင်ပို့ရာ နေရာလို့လည်း အများက ယူဆထားတာ ဖြစ်ပါတယ်။
