ဂရိနိုင်ငံကြွေးမြီအကျပ်အတည်း ဖေးမကူညီကြဖို့အတွက် ဥရောပသမဂ္ဂ ဘဏ္ဍာရေးဝန်ကြီးတွေ ဟာ ဘရပ်ဆဲလ်စ်မြို့မှာ ၁၃ နာရီကြာ အကြိတ်အနယ်ဆွေးနွေး ညှိနှိုင်းခဲ့ ကြပြီး အမေရိကန်ဒေါ်လာသန်းပေါင်း ၁၇၁,၀၀၀နဲ့ ညီမျှတဲ့ ယူရိုသန်းပေါင်း ၁၃၀,၀၀၀ ပံ့ပိုးရေး အတည်ပြုနိုင်ခဲ့ကြပါတယ်။
အခုလိုပံ့ပိုးပေးခြင်းအားဖြင့် ဂရိအစိုးရတင်နေတဲ့အကြွေးတွေ လျော့ကျသွားမှာဖြစ်ပါတယ်။ ဂရိနိုင်ငံ GDP ပြည်တွင်းအသားတင် ထုတ်လုပ်မှု တန်ဘိုးရဲ့ ၁၆၀% ဝန်းကျင် လျှော့ချနိုင်မှာဖြစ်ပါတယ်။ IMF နိုင်ငံတကာငွေကြေးရန်ပုံငွေအဖွဲ့က ရေရှည်ထိန်းထား နိုင်မယ်လို့ အမြင့်ဆုံး အဆင့်အဖြစ် သဘောထားတဲ့ GDP ရဲ့ ၁၂၀% လျှော့ချရေး ကိုတော့ ၂၀၂၀ ပြည့်နှစ်မှာ ပြည့်မီနိုင်မယ်လို့ ခန့်မှန်း ရပါတယ်။
ဂရိကြွေးမြီပြဿနာကယ်တင်ရေးဆွေးနွေးမှုကို အင်္ဂါနေ့မနက်ပိုင်းက သဘာတူခဲ့ကြတာပါ။ ဂရိရဲ့အကြွေး ယူရိုသန်းပေါင်း ၁ သိန်းကို လျှော်ပစ်ဖို့ ပုဂ္ဂလိကကြွေးရှင်တွေက သဘောတူခဲ့ကြပါတယ်။ ဂရိအကြွေးပြဿနာ အထိုက်အလျောက်ပြေလည်မှုရရှိတာကြောင့် အင်္ဂါနေ့က ယူရိုဈေးကွက် အတော်လေးတက်ခဲ့ပါတယ်။ တကယ်လို့ အကြွေး ပြဿနာမပြေလည်ခဲ့ရင် ရှေ့လကျရင် ဂရိနိုင်ငံ ဒေဝါလီခံရ မယ့်ကိန်းဆိုက်မှာဖြစ်ပါတယ်။
ဥရောပငွေကြေးဇုံ အကြီးအကဲ Jean-Claude Juncker ကအခုလို ဂရိအကြွေးအကျပ်အတည်းကို ဖေးမနိုင်ခြင်းဟာ ဂရိနိုင်ငံအတွက်ရော ယူရိုဇုံတခုလုံးအတွက်ပါ ဘဏ္ဍာရေးတည်ငြိမ်မှုကို ထိန်းထားနိုင်မှာဖြစ်တယ်လို့ပြောပါတယ်။ ဒါပေမဲ့ ဒီလိုအရေးပေါ်ကူညီနိုင်ဖို့အတွက် ဂရိနိုင်ငံဘက်ကလည်း လိုက်နာဆောင်ရွက်ရမယ့်ကိစ္စတွေ ပြည့်မီဖို့လိုတယ်လို့ သတိပေးလိုက်ပါတယ်။ ဂရိအစိုးရက အနိမ့်ဆုံးလစာကို ၂၂% လျှော့ပစ်တာနဲ့ အစိုးရဝန်ထမ်း ၁၅၀၀၀ အလုပ်ဖြုတ်ခဲ့ရတာအပါအဝင် ခြိုးခြံချွေတာရေးအစီအစဉ်အတည်ပြုခဲ့တာကြောင့် လူထုရဲ့ ငြိုငြင်ဆန္ဒပြမှုနဲ့ ရင်ဆိုင်နေရပါတယ်။
