ပထမဦးဆုံး စဉ်းစားစေချင်တဲ့အချက်ကတော့ မြန်မာနိုင်ငံမှာ အမျိုးသားဒီမိုကရေစီအဖွဲ့ချုပ် (National League for Democracy) က အခုအချိန်မှာ ခေါင်းဆောင်မှုမှာ အပြောင်းအလဲတချို့ လုပ်ဆောင်လာတာကို တွေ့ရပါတယ်။ အဓိကအားဖြင့် သက်ကြီးရွယ်အို ခေါင်းဆောင်ကြီးတွေဟာ ကျန်းမာရေးအခြေအနေကြောင့် ရုံးမလာနိုင်၊ အိမ်မှာပဲ နေကြတော့တယ်။ ဒီလိုအခြေအနေကြောင့် အသက်ရွယ်ငယ်တဲ့ ခေါင်းဆောင်များနဲ့ အစားထိုးဖို့ လုပ်ဆောင်လာတာကို တွေ့ရပါတယ်။ ဒါဟာ အသွင်သဏ္ဍာန်အားဖြင့် ပြောင်းလဲမှုသက်သက်ပဲလား၊ အနှစ်သာရအားဖြင့် ဘာတွေများ ပြောင်းလဲမှု ရှိလာနိုင်သလဲဆိုတာကို စူးစမ်းကြည့်ချင်တဲ့ သဘောဖြစ်ပါတယ်။ ဒီအကြောင်းအရာ အခြေအနေကို သိရှိနိုင်ဖို့ ကနေဒါ နိုင်ငံဆိုင်ရာ အန်အယ်လ်ဒီဌာနခွဲ ဥက္ကဌ ဦးအောင်တင် နဲ့ မြန်မာ့အရေး လေ့လာသုံးသပ်နေသူ ဦးမင်းဇော်ဦး တို့ကို ဦးကျော်ဇံသာ က ဆက်သွယ်ဆွေးနွေး တင်ပြထားပါတယ်။
ဦးကျော်ဇံသာ ။ ။ ပြည်တွင်းမှာ အန်အယ်လ်ဒီ ခေါင်းဆောင်မှုအပြောင်းအလဲနဲ့ ပတ်သက်ပြီးတော့ လက်ရှိဘယ်လို ဖြစ်လာနိုင်သလဲ ဆိုတာ မသွားခင်မှာ ဘယ်လိုအပြောင်းအလဲမျိုး ပြင်ဆင်နေကြသလဲ။
ဦးအောင်တင် ။ ။ ကျနော်မြင်တာက အပြောင်းအလဲဖြစ်လာတယ်လို့ မမြင်ဘူး။ ဒီဟာက လူအင်အားဖြည့်တာ၊ အင်အား တောင့်တင်းအောင် တိုးချဲ့တာ။ ဒါက ပုံသဏ္ဍာန်တမျိုး။ အရင်တုန်းကရှိနေတဲ့ လုပ်နည်းလုပ်ဟန်တွေက ပြောင်းလဲ သွားတယ်လို့ မမြင်ဘူး။ အပြောင်းအလဲလည်း လုပ်စရာ မလိုဘူးလို့ ကျနော်သုံးသပ်တယ်။
ဦးကျော်ဇံသာ ။ ။ လုပ်နည်းလုပ်ဟန်ပိုင်းကိုတော့ နောက်မှာဆွေးနွေးပါမယ်။ အခုလောလောဆယ်မှာ အပြောင်းအလဲက ဘယ်လိုလုပ်သလဲ၊ ဘယ်သူတွေ ဘယ်လို အစားထိုးသလဲဆိုတာကို ပြောစေချင်ပါတယ်။
ဦးအောင်တင် ။ ။ အခုဟာ အန်အယ်လ်ဒီမှာ လက်ရှိရှိနေတဲ့ အလုပ်ကော်မတီ (၁၄) ယောက် ရှိတယ်။ အဲဒီ (၁၄) ယောက် ထဲက (၉) ယောက်ကို အလုပ်အမှုဆောင်အဖွဲ့အဖြစ် တိုးချဲ့လိုက်တယ်ဆိုတဲ့ နောက်ဆုံးသတင်းကို ကျနော်တို့ သိထားတယ်။
ဦးကျော်ဇံသာ ။ ။ လောလောဆယ်မှာတော့ အရင်တုန်းက သက်ကြီးရွယ်အို ပုဂ္ဂိုလ်တွေတချို့ ရုံးကိုမလာကြတော့ဘူးလို့ သိရပါတယ်။ အဲဒီတော့ သူတို့ ရုံးကိုမလာကြတော့တဲ့ ပုဂ္ဂိုလ်တွေက တချိန်က ခေါင်းဆောင်တွေဖြစ်တယ်ဆိုတော့ အဲဒီလို နေရာတွေမှာ (အန်အယ်လ်ဒီမှာ တစုံတခု ဆွေးနွေးကြတဲ့အခါ) သူတို့ရဲ့ သဘောထား အဆုံးအဖြတ်တွေ ပါလာမှာ မဟုတ်တော့ဘူးပေါ့။
ဦးအောင်တင် ။ ။ အမှန်က လက်ရှိအနေအထားမှာက ဒီ (၉) ယောက်ကို ထည့်လိုက်မှ မဟုတ်ဘူး။ (၉) ယောက်ကို မထည့်ခင်ကတည်းက နှစ်ကာလ တော်တော်ကြာကြာက ဥက္ကဌ ဦးအောင်ရွှေ၊ အတွင်းရေးမှုး ဦးလွင် တို့က စီမံခန့်ခွဲမှု အပိုင်းမှာ မလုပ်နိုင်တာ ကြာခဲ့ပြီ။ ဒီအတွက် ရှိတဲ့လူတွေက ဝိုင်းရံပြီး လုပ်နေတာပါ။ အခု ရှိနေတဲ့လူတွေကို ဆက်ပြီး ထားတဲ့ဟာကလည်း နဂိုပုံသဏ္ဍာန်အတိုင်းဘဲ စွန့်လွတ်ပေးဆပ်ခဲ့တာကို အသိအမှတ်ပြုထားတဲ့ သဘောပါ။ ဒီအပေါ်မှာ သူတို့ တိုးချဲလိုက်လို့ ဦးအောင်ရွှေ တို့ရဲ့ အခန်းကဏ္ဍ လျော့သွားတယ်၊ ပိုလာတယ်လို့ ကျနော်မမြင်ဘူး။ နဂိုအတိုင်းပဲ မတိုးချဲ့ခင်ကတည်းကအတိုင်း ဦးအောင်ရွှေ တို့ နဂိုအနေအထားမှာ ရှိနေမယ်။ တိုးချဲ့ခြင်းအားဖြင့် အင်တိုက်အားတိုက်နဲ့ တက်တက်ကြွကြွနဲ့ စည်းစည်းကားကား လှုပ်ရှားမှုတွေ ဖြစ်လာမှာကို အကောင်းဘက်က အများကြီးမျှော်လင့်နေပါတယ်။
ဦးကျော်ဇံသာ ။ ။ လုပ်နည်းလုပ်ဟန်တော့ မပြောင်းဘူးဆိုပေမယ့်လို့ ဆိုကြပါတော့ စစ်အာဏာပိုင်တို့က ခေါ်ပြီးတော့ ဆွေးနွေးမယ်ဆိုတဲ့နေရာမှာ ဦးအောင်ရွှေ၊ ဦးလွင် တို့ မပါတော့ဘူးပေါ့။ နိုင်ငံတကာ ဂုဏ်သရေရှိတဲ့ ပုဂ္ဂိုလ်တွေ၊ ကုလသမဂ္ဂ၊ အမေရိကန်အစိုးရ အရာရှိကြီးတွေ သွားပြီးတွေ့ရတဲ့အခါမှာ ဒီပုဂ္ဂိုလ်ကြီးတွေရဲ့ သဘောထားကို မပြောကြ တော့ဘူးလား။ အဲဒါကို ကျနော်အဓိက ပြောလိုခြင်း ဖြစ်ပါတယ်။ ဦးမင်းဇော်ဦး အနေနဲ့ ဒီ အပြောင်းအလဲကို ဘယ်လို မြင်ပါသလဲ။
ဦးမင်းဇော်ဦး ။ ။ မြန်မာပြည်မှာ အန်အယ်လ်ဒီ အနေနဲ့ ခေါင်းဆောင်မှုကို တိုးချဲလိုက်တယ်ဆိုပေမယ့် အဓိက လက်ရှိအထိ သိပ်မကွဲပြားတဲ့အချက်က အန်အယ်လ်ဒီအထဲမှာ ပေါ်လစီ ဘယ်လိုလုပ်လဲဆိုတာ မကွဲပြားဘူး။ ဆိုလိုတာက အန်အယ်လ်ဒီ ထဲမှာရှိတဲ့ စီအီးစီ (Central Executive Committees) တွေ အားလုံးက မဲနဲခွဲပြီး ပေါ်လစီလုပ်ကြတာလား။ ဒါမှမဟုတ် အဲဒီ အထဲမှာ အဓိကကျတဲ့ ဒေါ်အောင်ဆန်းစုကြည်၊ ဦးတင်ဦး တို့လို ပုဂ္ဂိုလ်တွေရဲ့ အသံတွေက ပိုပြီးတော့ အခရာ ကျပြီးတော့ သူတို့ ပါးစပ်ထဲက ထွက်လာတာတွေက တကယ် ပေါ်လစီသွားတာလားဆိုတာကို ကျနော်တို့ အခုထိ မသိသေးဘူး။ မသိတော့ အပြင်ကနေပြီးတော့ ဒီလူတွေ အများကြီးထည့်လိုက်ခြင်းအားဖြင့် ပေါ်လစီ အရ ဘယ်လို အပြောင်းအလဲ ရှိနိုင်သလဲဆိုတာကိုတော့ အပြင်ကနေ ခန့်မှန်းရတာ ခက်ခဲ့တယ်။ နောက်တချက်ကတော့ ဗမာနိုင်ငံရေး ယဉ်ကျေးမှုမှာ အထူးသဖြင့် ဒီမိုကရေစီ ကျင့်စဉ်အားနည်းတဲ့ ဘယ်နိုင်ငံမှာဘဲဖြစ်ဖြစ် အတိုက်အခံ လှုပ်ရှားမှုအားလုံးမှာ ပေါ်လစီ အပြောင်းအလဲလုပ်ရတာ ခေါင်းဆောင်ပြောင်းလုပ်ရတာ အတော်ခက်တယ်။ အန်အယ်လ်ဒီ အပြင် နယ်စပ်မှာရှိတဲ့ အတိုက်အခံတွေကို ကြည့်လို့ရှိရင်လည်း ခေါင်းဆောင်တယောက် ဖြစ်လာရင် တသက်လုံး ခေါင်းဆောင်ဖြစ်သွားတယ်။ ခေါင်းဆောင်အပြောင်းအလဲဆိုတာ အရမ်းရှားတယ်။ သေမှပဲ နာမကျန်းဖြစ်မှပဲ အဲဒီခေါင်းဆောင်ကနေ ဘေးထွက် ထိုင်တာမျိုးရှိတယ်။
အဲဒီတော့ ဒီနိုင်ငံရေး ယဉ်ကျေးမှုအရ ခေါင်းဆောင်မှုတခု ဖြစ်လာလို့ရှိရင် ဒီခေါင်းဆောင်တယောက်က သူရဲ့ performance လုပ်နိုင်မှု၊ achievement အောင်မြင်မှု ဘယ်လောက်ရှိလည်း အဲဒီအပေါ်မှာ တိုင်းတာမဟုတ်တော့ဘဲနဲ့ အဲဒီခေါင်းဆောင်တယောက်က ဘယ်လောက် အနစ်နာတွေခံထားရတယ်၊ ဘယ်လောက်အထိ ဒီအဖွဲ့အစည်းပေါ်မှာ သစ္စာရှိတယ်၊ လက်ရှိ ပေါ်လစီပေါ်မှာ ဘယ်လောက်အထိ ရပ်တည်တယ်စတဲ့ အဲဒီအခြေခံတွေနဲ့ ကျနော်တို့က အဲဒီ ခေါင်းဆောင်နောက်ကို လိုက်ကြတယ်။ အဲဒီတော့ အတိုက်အခံထဲမှာဘဲဖြစ်ဖြစ်၊ နအဖထဲမှာဘဲဖြစ်ဖြစ် ခေါင်းဆောင်မှုကို ကြည့်လိုရှိရင် ခေါင်းဆောင်မှုတခု ဖြစ်လာတယ်ဆိုရင် သူရဲ့ အောင်မြင်မှုအပေါ်မှာ အခြေမခံတော့ဘဲနဲ့ သူရဲ့ ပုဂ္ဂိုလ်ရေး အရ အနစ်နာခံမှုတွေပေါ်မှာ အခြေခံပြီး ကျနော်တို့က ဆုံးဖြတ်သွားကြတာဖြစ်တယ်။ အဲဒီတော့ ဒီအချက်နှစ်ချက်အပေါ် မူတည်ပြီးတော့ အန်အယ်လ်ဒီမှာ ခေါင်းဆောင်မှုတွေ ချဲ့လိုက်ပေးမယ့်လည်း ဘယ်လောက်အထိ လုပ်ဟန်အရ၊ ပေါ်လစီ အရ အပြောင်းအလဲဖြစ်လာမလဲဆိုတာကို ခန့်မှန်းရ စောသေးတယ်လို့ ကျနော်ထင်ပါတယ်။
ဦးကျော်ဇံသာ ။ ။ ဟုတ်ကဲ့ ဦးအောင်တင် ကိုဘဲ ကျနော်မေးချင်ပါတယ် ဦးမင်းဇော်ဦး မေးတဲ့ (၂) ချက်မှာ ပထမအချက် ဖြစ်တဲ့ အန်အယ်လ်ဒီအတွင်းမှာ ပေါ်လစီချမှတ်တဲ့အခါမှာ ဘယ်လိုချမှတ်ကြတယ်ဆိုတာကို ရှင်းရှင်းလင်းလင်း မသိရသေး ဘူးဆိုပါတယ်။ ဦးအောင်တင် အနေနဲ့ ဘယ်လိုများ ရှင်းပြနိုင်မလဲ၊ ဘယ်လိုချမှတ်တယ်ဆိုတာ ရှင်းပြနိုင်မလား။
ဦးအောင်တင် ။ ။ ကိုမင်းဇော်ဦး ဆွေးနွေးတဲ့ အကြောင်းအရာသက်သက်ကတော့ မှန်ပါတယ်။ ဒါပေမဲ့ လက်ရှိအခြေအနေနဲ့ ချိန်းထိုးလိုက်မယ်ဆိုရင် တချို့ဟာတွေက လက်တွေ့ကျကျ သုံးသပ်လို့မရဘူးလို့ ထင်တယ်။ ဥပမာအားဖြင့် ခေါင်းဆောင် ပိုင်းနေရာက တသက်လုံး ဒီလိုဖြစ်သွားတယ်ဆိုတာ ကျနော်တို့ကို အမေရိကန်၊ အင်္ဂလန်တို့က ဒီမိုကရေစီနိုင်ငံတွေမှာလို့ မဲတွေနဲ့ လူတွေကိုရွေးလို့ ရွေးနိုင်တဲ့ အနေအထားတွေက ကျနော်တို့နိုင်ငံမှာ အခြေအနေမပေးဘူး၊ အစည်းအဝေးတွေ တောင် လုပ်လို့မရဘူး။ တောတွင်းဆိုလည်း တောတွင်းအလျှောက် တော်လှန်ရေးသမားတွေ၊ ပြည်တွင်းဆိုလည်း ပြည်တွင်း အလျောက်ဆိုတော့ ဒီဟာကို ကျနော်တို့ ပါတီဝင်တွေက အုံ့အုံ့ ကြွက်ကြွက် လာရောက်မဲပေးကြမယ်၊ ခေါင်းဆောင် အပြောင်းအလဲ လုပ်ရမယ်ဆိုတဲ့အရာက လက်တွေ့အခြေအနေနဲ့ မကိုက်ညီဘူး။ ဒါကို သဘောမတူဘူးလို့ ပြောတာ မဟုတ်ဘူး။ ဒီဟာကို ထည့်တွက်ဖို့လိုတယ်။ နောက်တချက် ပေါ်လစီပိုင်းဆိုင်ရာကတော့ ပေါ်လစီက ကျနော် နားလည်သလို ပြောရရင် ကျနော်တို့မှာ ရည်မှန်းချက်ဆိုတာရှိတယ် - ဒီမိုကရေစီနိုင်ငံ တည်ထောင်မယ်၊ ပြည်ထောင်စုကြီး လုပ်မယ်ဆိုတဲ့ ရည်မှန်းချက်ပေါ့။ ဒီရည်မှန်းချက်ကို သွားတဲ့အခါမှာ လုပ်ငန်းစဉ်တွေကို ပေါ်လစီလို့ ပြောင်းမယ်ဆိုရင် ကျနော်မြင်သလောက်တော့ ဒီ ပေါ်လစီတွေက မြေအောက်လှုပ်ရှားတဲ့ နိုင်ငံရေးပါတီတခုရဲ့ ပေါ်လစီလည်း မဟုတ်တဲ့ အတွက်ကြောင့် အန်အယ်လ်ဒီ ရဲ့ ပေါ်လစီက အင်မတန် ထင်သာမြင်သာ ရှိပါတယ်။ အခုအချိန်အထိ အန်အယ်လ်ဒီရဲ့ ပေါ်လစီဟာ မှန်နေတုန်းဘဲ။ ပြင်စရာလည်း မလိုသေးဘူးလို့ ကျနော်မြင်တယ်။
ဦးကျော်ဇံသာ ။ ။ အခုက အဲဒါကိုပြောတာ မဟုတ်ပါဘူး။ ပေါ်လစီကို ဘယ်လိုချမှတ်ကြသလဲဆိုတဲ့ Process ကို သိချင်လို ပြောတာပါ။
ဦးအောင်တင် ။ ။ ကျနော်တို့ ရှိပြီသာ ပေါ်လစီက ဒီအတိုင်းဘဲ သွားရမှာဆိုတော့ ဒီအပေါ်မှာ ကျနော်တို့ သာမန် အလျှော့အတင်းပဲ လုပ်တဲ့ ကာလပဲ ရှိပါသေးတယ်။ ကျနော်တို့ အန်အယ်လ်ဒီ ဟာ မိမိရဲ့ နိုင်ငံရေးအချိုးအကွေ့ကြီး တခုလုံးကို ပြောင်းသွားတဲ့အနေအထား မရောက်သေးပါဘူး။ မရောက်သေးတဲ့အခါမှာ ဒီဥစ္စာကို ချမှတ်တဲ့အခါမှာ အခု လက်တွေ့ကျကျ ဘယ်သူချမှတ်သလဲဆိုရင်တော့ အခု ဒီ (၉) ယောက် မတင်ခင်က ရှိတဲ့ လေးငါးယောက်ပဲ တိုင်ပင်ပြီး ချမှတ်တယ်လို့ ပြောနိုင်ပါတယ်။
ဦးကျော်ဇံသာ ။ ။ အဲဒီအတိုင်းဘဲ ဆက်လျှက်ရှိနေမှာပေါ့။ ဒီခေါင်းဆောင်တွေ ပြောင်းပေမဲ့ မူဝါဒကတော့။
ဦးအောင်တင် ။ ။ လက်ရှိအနေအထားကတော့ ဒီအတိုင်းပဲ (၉) ယောက်တိုးသွားရင် (၉) ယောက်တိုးပြီး ပိုပြီး အလုပ်လုပ် နိုင်မယ်။ ဒီလိုပဲ ကျနော်မြင်ပါတယ်။
ဦးကျော်ဇံသာ ။ ။ ဟုတ်ကဲ့ ဦးမင်းဇော်ဦး သဘောထား။
ဦးမင်းဇော်ဦး ။ ။ ကျနော် အခုနပြောတဲ့အတိုင်းပါဘဲ။ ကျနော်ဘက်ကတော့ အခုအချိန်က အန်အယ်လ်ဒီ အပြောင်းအလဲ ဖြစ်ဖို့အတွက် ဒီခေါင်းဆောင်မှု အပြောင်းအလဲ အဖြေတခုထွက်လာနိုင်မလား ပြောဖို့ စောသေးတယ်လို့ ကျနော် ထင်ပါ တယ်။ နောက်ပြီးတော့ တချို့အချက်အလက်တွေက အန်အယ်လ်ဒီအတွင်းမှာ ဖြစ်နေတဲ့ သူတို့ ပေါ်လစီပိုင်းဆိုင်ရာမှာ ဘယ်လိုဆုံးဖြတ်ချက်ချတယ်ဆိုတာကို ကွဲကွဲပြားပြား မသိဘူး။ နောက်တချက်က အဓိက ဒေါ်အောင်ဆန်းစုကြည်ပေါ့။ အန်အယ်လ်ဒီမှာ ကျန်တဲ့လူတွေက ဒေါ်အောင်ဆန်းစုကြည် နဲ့ ဖီလာဆန့်ကျင်ဖြစ်တယ်၊ မတူတဲ့သဘောမျိုး ပေးနိုင်တဲ့ position မှာရှိလား၊ ပေးရဲတဲ့ position မှာရှိလား ဆိုတာကို ကွဲကွဲပြားပြား မသိရဘူး။ အဲဒီတော့ အခုအချိန်က ပြောဖို့ စောသေးတယ်လို့ ကျနော်ထင်ပါတယ်။
ဦးကျော်ဇံသာ ။ ။ နောက်တခုက အပြင်က အန်အယ်လ်ဒီကို မြင်ကြတဲ့အမြင် အထူးသဖြင့် ဗိုလ်ချုပ်ဟောင်းတွေက ခေါင်းဆောင်မှုမှာဖြစ်နေတဲ့ အတွက်ကြောင့် အန်အယ်လ်ဒီ က သက်သာရာရတယ်လို့ တချို့က သုံးသပ်ခဲ့ကြတာရှိပါတယ်။ အဲဒီ ပုဂ္ဂိုလ်တွေကလည်း စစ်အစိုးရနဲ့ ထိပ်တိုက်တွေ့မှာကို သိပ်မလုပ်ကြဘဲနဲ့ ဒေါ်အောင်ဆန်းစုကြည် ရှိတဲ့ကာလမှာ အန်အယ်လ်ဒီ ဆက်လက်ရပ်တည်ရေးကိုသာ သူတို့လုပ်နေကြတာကို နားလည်ပေးရမယ်ဆိုတဲ့ သဘောထားမျိုး ရှိကြပါ တယ်။ အခု အဲဒီအထဲက အဓိကကျတဲ့ ပုဂ္ဂိုလ်တွေ သွားပြီးဆိုတော့ အန်အယ်လ်ဒီ ကို မြင်တဲ့အမြင် ပြောင်းလဲနိုင်စရာ အကြောင်း မြင်ပါသလား။
ဦးမင်းဇော်ဦး ။ ။ ကျနော်အမြင်ကတော့ အန်အယ်လ်ဒီ ထဲမှာ စစ်တပ်က လူတွေရှိတယ် မရှိဘူးဆိုတာက ဒီလူ ဗမာပြည်ရဲ့ နိုင်ငံရေးလောကမှာ ရှိလိုရှိရင် ကျနော်တို့က ဝါကို အရမ်းဦးစားပေးတယ်။ ဝါကို အရမ်းဦးစားပေးတော့ တချိန်တုန်းက နိုင်ငံရေးလုပ်ခဲ့တဲ့လူတွေ၊ နိုင်ငံရေးထဲက ကန်ထုတ်ခံရသူတွေက ရှစ်လေးလုံး ပေါ်လာတဲ့အခါမှာ အဲဒီလူတွေက စင်ပေါ် ပြန်ရောက်လာတယ်။ အဲဒီတော့ အန်အယ်လ်ဒီထဲမှာ စစ်ခေါင်းဆောင်တွေ ပါသည်ဖြစ်စေ၊ မပါသည်ဖြစ်စေထား ကျနော် ထင်တာက ဗမာပြည်နိုင်ငံရေး ယဉ်ကျေးမှုမှာ ဝါအရ အစဉ်အလာရှိတဲ့လူက ပိုပြီးတော့ စင်ပေါ်ရောက်ဖို့ ပိုလွယ်တယ်လို့ ကျနော်ထင်ပါတယ်။
ဦးကျော်ဇံသာ ။ ။ နောက်တခါ တချို့ ပညာရှင်တွေက သုံးသပ်ကြတယ်။ ဟုတ်သော်ရှိ မဟုတ်သော်ရှိ သူတို့က ဘယ်လို ပြောသလဲဆိုတော့ ရှစ်ဆယ့်ရှစ် နောက်ပိုင်းမြန်မာနိုင်ငံရဲ့ နိုင်ငံရေးပြဿနာဟာ မျိုးဆက်သစ်အာဏာလက်ရှိ စစ်ဗိုလ် တွေနဲ့ အာဏာကပြုတ်ပြီးသွားတဲ့ စစ်ဗိုလ်တွေကြား ပဋိပက္ခလို မြင်ခဲ့ကြပါတယ်။ ဒီလို သုံးသပ်ချက်မျိုး လွတ်သွားပြီလားလို့ မေးချင်ပါတယ်။
ဦးအောင်တင် ။ ။ ပဋိပက္ခတို့ ဘာတို့ဆိုတာကတော့ ပေါ်လစီပိုင်းဆိုင်ရာ ထိခိုက်လောက်အောင် ကြီးကျယ်တယ်လို့ မထင်ပါဘူး။ ဘာဖြစ်လို့လဲဆိုတော့ အခုနပြောသလို စစ်သားရှိလို့ အန်အယ်လ်ဒီ ထားတယ်ဆိုတဲ့ပုံစံမျိုး၊ အန်အယ်လ်ဒီကို ဒုက္ခမပေးတာ အန်အယ်လ်ဒီ အထဲမှာ ဗိုလ်ချုပ်တွေရှိလို့ - ဒီ ဗိုလ်ချုပ်တွေဘဲ ဗိုလ်ချုပ်အချင်းချင်း အကျဉ်းချထားတာတွေ ရှိတာပါဘဲ။ ဒီဟာက အာဏာမှာ ကိုးကွယ်တဲ့ဘာသာလည်း မရှိဘူး။ အာဏာမှာ ethics ဆိုတာလည်း မရှိဘူး။ လူတယောက်က အာဏာရှင်တယောက်ဖြစ်လာရင် သူက အကုန်လုပ်တာပဲ။ ဒီဟာက အာဏာရှင်နဲ့ ဒီမိုကရေစီ တိုက်ပွဲ လို့ပဲ မြင်တယ်။
ဦးကျော်ဇံသာ ။ ။ ဟုတ်ကဲ့ ဦးမင်းဇော်ဦးအနေနဲ့ ဘယ်လိုမြင်ပါသလဲ။
ဦးမင်းဇော်ဦး ။ ။ ကျနော်ကတော့ အန်အယ်လ်ဒီနဲ့ စစ်တပ်ရဲ့ ကြားထဲမှာတော့ စစ်ဗိုလ်ဟောင်း၊ စစ်ဗိုလ်သစ် လို့ မမြင်ဘူး။ အဓိကတော့ ဗမာပြည်နိုင်ငံရေး မျက်နှာစာမှာ ပဋိပက္ခတွေ ဖြစ်လာတိုင်းမှာ အဟောင်းနဲ့ အသစ် ဆိုတာကို တွေ့ရမှာပဲ။ ဒါက ဘာဖြစ်လို့ အဟောင်းနဲ့ အသစ်ကို တွေ့ရသလဲဆိုတော့ ဗမာပြည်နိုင်ငံရေးရဲ့ ဖြစ်စဉ်ကကို ဝါကို ဦးစားပေးတဲ့ နိုင်ငံရေးလို လုပ်တဲ့ဟန်က ရှိနေတယ်။ အဓိကကျနော်မြင်တာကတော့ စစ်တပ်နဲ့ စစ်တပ်ရဲ့ ဦးဆောင်မှုကို လက်မခံချင်တဲ့ လူတွေရဲ့ ကြားမှာရှိတဲ့ ပဋိပက္ခလို့ ကျနော်ထင်ပါတယ်။
ဦးကျော်ဇံသာ ။ ။ ဟုတ်ကဲ့ ကျနော် နောက်ဆုံးတခု မေးချင်တာက တချို့က အန်အယ်လ်ဒီ ခေါင်းဆောင်မှုထဲမှာ သဘောထားကွဲလွဲမှုတွေ အရိပ်အယောင်တွေ တွေ့နေရတယ်ဆိုပြီးတော့ လမ်းကြောင်းပေးတာလား၊ တကယ်မြင်လို့ သုံးသပ်သလား မသိဘူး အဲဒီလို ကောလဟလတွေ ကြားနေရပါတယ်။ ဘယ်လောက်ဖြစ်နိုင်ခြေ ရှိပါသလဲ။
ဦးအောင်တင် ။ ။ ဒီမိုကရေစီမှာ သဘောထားကွဲလွဲမှုဟာ အင်အားပဲ။ ဒီဟာတွေကို ကျနော်တို့က အမြဲတမ်း ကြိုဆိုတယ်၊ အမြင်မတူတာတွေ၊ ချည်းကပ်ပုံမတူတာတွေက ရှိသင့်ရှိထိုက်တဲ့ ကိစ္စတွေဘဲ။ ပြဿနာအန္တရာယ်လို့ မမြင်ဘူး။ ကျနော် ကြိုဆိုတယ်၊ ဒီအပေါ်မှာ သူတို့ အကောင်းဆုံးကို သူတို့ ဆုံးဖြတ်ကြမယ်လို့ ကျနော်ယုံကြည်ပါတယ်။
ဦးကျော်ဇံသာ ။ ။ ဟုတ်ကဲ့ ဦးမင်းဇော်ဦးရဲ့ နောက်ဆုံးမှတ်ချက် အန်အယ်လ်ဒီမှာ စိတ်ဝမ်းကွဲမှုတွေ၊ သဘောထားကွဲလွဲမှု တွေ ရှိတဲ့ဆိုတဲ့ ကောလဟလ ပတ်သက်ပြီးတော့ ဘာများပြောချင်ပါသလဲ။
ဦးမင်းဇော်ဦး ။ ။ ကျနော်တို့လည်း သဘောထားကွဲလွဲမှုတွေရှိတယ်လို့ ကြားရပါတယ်။ ဒါပေမဲ့ အန်အယ်လ်ဒီရဲ့ တကယ့်သူ့ရဲ့ မှတ်ကျောက်တင်ခံနိုင်မယ့် စစ်တမ်းက လပိုင်းအတွင်းမှာ လာပါလိမ့်မယ်။ အခု elections ကလည်း အောက်တိုဘာမှာ လုပ်မယ်လို့ ပြောနေပြီ။ အဲဒီတော့ အန်အယ်လ်ဒီ ဟာ အဲဒီ elections ဝင်တယ်၊ မဝင်ဘူးဆိုတာကို သူတို့အထဲမှာ ရှိတဲ့ခေါင်းဆောင်ပိုင်းမှာ ဆုံးဖြတ်ချက် ချနိုင် မချနိုင်ဘူးဆိုတဲ့ အပေါ်က ဆုံးဖြတ်ပေးသွားမယ်လို့ ကျနော် ထင်တယ်။
