ထိုင်းတောင်ပိုင်း ကားမှောက် မြန်မာ ၂၀ ခန့် ထိခိုက်
ထိုင်းနိုင်ငံတောင်ပိုင်း၊ ချုံဖွန်ခရိုင်နဲ့ ပရာကျွတ် ခီရီခန်ခရိုင်၊ ဘန်ဆာဖန်နွယ် မြို့နယ်အစပ်မှာ တရားမဝင် မြန်မာတွေသယ်ဆောင်လာတဲ့ ကားတစီးဟာ လုံခြုံရေး စစ်ဆေးရေးဂိတ်မှာ အစစ်ဆေးမခံပဲ မောင်းပြေးရာကနေ ကားတိမ်းမှောက်ပြီး ကားပေါ်ပါလာသူအားလုံးနီးပါး ဒဏ်ရာတွေရခဲ့ပြီး ဆေးရုံ ၄ ခုကိုပို့ ကုသနေရပါတယ်။ ဒီသတင်းကို ဗွီအိုအေ သတင်းထောက် မအေးအေးမာက သတင်းပေးပို့ထားပါတယ်။
ထိုင်းနိုင်ငံတောင်ပိုင်း ချုံဖွန်ခရိုင်နဲ့ ပရာကျွတ်ခီရီကန်ခရိုင် ဘန်ဆာဖန်နွယ်မြို့နယ်အစပ်မှာ တရားမဝင်မြန်မာတွေ လိုက်ပါလာတဲ့ကား တိမ်းမှောက်ခဲ့တာပါ။ လူကုန်ကူးသူတွေ ခေါ်လာပြီး ထိုင်းမလေးနယ်စပ်ထိသွားဖို့ စီစဉ်ထားပေမယ့် ချုံဖွန်ခရိုင်ထဲက စစ်ဆေးရေးဂိတ်ကို ရှောင်ကွင်းမောင်းနှင်ရာကနေ တိမ်းမှောက်ခဲ့တာဖြစ်ကြောင်းအလုပ်သမားရေး လှုပ်ရှားသူ ဦးမိုးကြိုးက ပြောပါတယ်။
" ထိုင်းနိုင်ငံ Chumphon ချုံဖွန်ခရိုင်ထဲမှာ တရားမဝင်နယ်စပ်ဖြတ်ကျော် ဝင်ရောက်လာပြီး မြန်မာအလုပ်သမားတွေတင်လာတဲ့ ကားဟာ နိုဝင်ဘာလ ၁ ရက်နေ့က တိမ်းမှောက်ပြီး တရားမဝင် မြန်မာ ၁၈ ယောက်နဲ့ ထိုင်းကားမောင်းသမားတဦး ဒဏ်ရာရပါတယ်။ အဲဒီကားက လုံခြုံရေးတပ်ဖဲွတွေရဲ့ စစ်ဆေးမှုကိုမခံပဲ မောင်းပြေးတာကြောင့် တိမ်းမှောက်တာဖြစ်တယ်။ ယာဉ်တိမ်းမှောက်မှုကြောင့် ကလေးတဦးအပါအဝင် မြန်မာအမျိုးသား ၈ ဦး နဲ့ အမျိုးသမီး ၁၀ ဦးပါတယ် အားလုံး ၁၈ ဦး ဒဏ်ရာရပါတယ်။ ထိုင်းယာဉ်မောင်းတဦး ဒဏ်ရာရပါတယ်။ "
ဒီလိုယာဉ်တိမ်းမှောက်မှုတွေက မကြာခန ဖြစ်နေပြီး ၂၀၂၃ နှစ်စကနေ ၁၀ လအတွင်း မြန်မာအလုပ်သမား ၁၀ ဦးလောက် သေဆုံးခဲ့တာတွေလည်း ရှိခဲ့တယ်လို့ သူက ပြောပါတယ်။
" ၂၀၂၃ ထဲမှာ ဒီလိုယာဉ်တိမ်းမှောက်မူ့က ၅ မှုထက်မနည်းဖြစ်တယ် သေဆုံးသူက ၁၀ ဦးဝန်းကျင်ရှိတယ် ဒဏ်ရာရသူ အားလုံးပေါင်းရင် ၁၀၀ လောက်ရှိတယ်။ များသောအားဖြင့် ထိုင်းတောင်ပိုင်း ချုံဖွန် အခုဖြစ်စဉ်လိုပေါ့ ကပ်ရက်က ပရာကျွတ်ခီရီကန် နကွန်စီဌာမရတ် အဲဒီနေရာတွေမှာ ဖြစ်တယ်။ "
ယာဥ်တိမ်းမှောက်မှု ဖြစ်စဥ်အတွင်း ဒဏ်ရာအပြင်းအထန် ရရှိသူေတွကိုတော့ ဆလုံမြို့နယ်၊ သာဆာဆေးရုံနဲ့ အမ်မရစ်ဆေးရုံမှာ ဆေးကုသဖို့ ပို့ဆောင်ပေးခဲ့တယ်လို့ ချုံဖွန်ခရိုင် ရဲတပ်ဖဲွ့ပြောပါတယ်။ ဒီကားသမားဟာ ရာချန်ဘူရီခရိုင်ကနေ နခွန်စီဌာမရတ်ခရိုင် ထဲကို ပထမအကြိမ်အဖြစ် တရားမဝင် အလုပ်သမား ပို့ဆောင်တုန်း ကားတိမ်းမှောက်ခဲ့တာလို့လည်း ဆိုပါတယ်။ ယာဥ်မောင်းနဲ့ တရားမဝင် လုပ်သားတွေကို တရားဥပဒေအရ ဆက်လက်အရေးယူမယ်လို့ ထိုင်းရဲမှူးချုပ် ပနုဒက် နဖာသာလန်းက ပြောပါတယ် ။
